Другое месца раённых спаборніцтваў па выніках жніва у ААТ “Неўскі-Агра”

Другі па велічыні паказчык намалоту зерня збожжавых і зернебабовых раслін у раёне — у ААТ “Неўскі-Агра” (6 399 тон). Здавалася б, можна з палёгкай выдыхнуць і спаўна парадавацца: і дзяржаўны заказ па збажыне болей чым у тысячу тон своечасова выканалі, і насення, фуражу будзе… Калі б не адно “но” — у мінулым го­дзе пры тых жа пасяўных плошчах намалацілі прыкладна на трэць болей.

— Паўплывала засушлівае надвор’е, — кажа галоўны аграном гаспадаркі Аляксандр Іванавіч Мельнік. — Хоць зроблена было шмат, стараліся прытрымлівацца тэхналогій: папярэднікі прадугле­дзелі, пасеялі ўсё своечасова, правялі сортаўзнаўленне, дзеля чаго набылі элітнае насенне і культур, і гібрыдаў, догляд быў належным… Праўда, бачыць вопытны аграном, які, дарэчы, заняў 3-е месца ў раённым спаборніцтве сярод галоўных аграномаў, і тэхналагічныя хібы. Цягам апошніх 5-6 год, як кажа, не мелі магчымасці ўнесці фосфарныя ўгнаенні пад збажыну, не дадавалі арганічных: сказаліся недастатко­васць тэхнікі, фінансавыя магчымасці гаспадаркі. Таму цяпер, як тут кажуць, стаўка робіцца на нарыхтоўку травянога корму: каб быць з малаком, мясам, прадаваць іх — зарабляць грошы і развівацца. Ва ўсялякім разе, як заўважае дырэктар сельгасарганізацыі Алі Ахмедаў,
зладжаны і працаздольны калектыў “Неўскага-Агра” на гэта нацэлены.

Асабліва хвалюючым — сапраўдным выпрабаваннем на прафесіяналізм — стала сёлетняе жніво для галоўнага інжынера ААТ “Неўскі-Агра” Сяргея Віктаравіча Нікалаенка, на якога была ўскладзена арганізацыя работы машынна-­трактарнага парку падчас уборкі ўра­джаю: новы калектыў, значна большыя пасяўныя плошчы, чым у філіяле “Варатынь”, дзе да гэтага працаваў. Аднолькавай была хіба што сур’ёзнасць пастаўленай задачы — арганізаваць уборку хлябоў якасна, своечасова і без страт.

На запытанне, ці вытрымаў галоўны спецыяліст іспыт на прафесіяналізм найперш перад сабой, з усмешкай адказвае: “Як бачыце”. Трэба адзначыць, што Сяргей Віктаравіч заняў другое месца ў раённым спаборніцтве сярод галоўных інжынераў.

— З кадрамі апошнім часам складана, напэўна, не ў адных нас, але была правільна выбудавана лагістыка, не было асаблівых праблем з тэхнікай, таму, здаецца, атрымалася. Хоць, па праўдзе, сам не чакаў: было 2 300 гектараў каласавых, цяжар у сярэднім на камбайн — значны, але ў разгар уборкі ў падмогу атрымалі новенькі камбайн, і тэхніка гэтая добра выручыла. Так што як бы не было складана — з пастаўленай задачай справіліся, — кажа субяседнік.

На гэтую пару ў ААТ “Неўскі-­Агра” завяршылі сяўбу азімых — пасеялі 1 500 гектараў, рыхтуюцца да ўборкі кукурузы на зерне.

Мікалай Крусір — вадзіцель-пераможца

У ліку пераможцаў раённага спаборніцтва і Мікалай Крусір з ААТ “Неўскі-Агра”. Ён заняў 1-е месца сярод вадзіцеляў транспартных сродкаў сельскагаспадарчых і іншых арганізацый, якія ажыццяўлялі перавозку зерня ад камбайнаў.

Родам Мікалай Усеваладавіч з суседняй Украіны. Трапіў у Беларусь, на Бабруйшчыну, у 2014 годзе падчас неспакою на яго радзіме. У аграгарадку сям’і перасяленцаў вылучылі добраўпарадкаванае жыллё, гаспадару прапанавалі работу вадзіцеля ў мясцовай гаспадарцы (ва Украіне ў яго быў уласны аўтобус, на ім і працаваў). За 7 год, што жыве ў аграгарадку, да месца, да людзей мой суразмоўца, як кажа, прызвычаіўся, адчувае сябе тут утульна і спакойна. Тым болей што і кіраўніцтва, і людзі мясцовыя да яго і сям’і добра ставяцца. І хоць сум па родных мясцінах прысутнічае, пытання, каб вярнуцца на радзіму, ва ўсялякім разе цяпер, калі неспакой застаецца, — сям’я не ставіць. А вось да дачкі ва Украіну бацькі перыядычна наведва­юцца. Праўда, штогодная традыцыя з-за пандэміі апошнія два гады парушана. Але Мікалай Усеваладавіч спадзяецца, што цяпер, калі з’явілася магчымасць вакцыянавацца, — будзе адноўлена.

На МАЗ мой субяседнік “сеў”, як кажа, не адразу. Першы год у калгасе выконваў рознага віду работы і стараўся, імкнуўся станоўча сябе зарэкамендаваць. Ва ўборачныя кампаніі, і сёлетнюю таксама, яго задачай было перавозіць зерне ад камбайнаў. Справа хоць і звыклая, але патрабуе ад ва­дзіцеля павышанай увагі, акуратнасці і пільнасці. Усе гэтыя якасці Мікалаю Усеваладавічу характэрныя, таму і выніку дасягнуў высокага, пачэснага — увайшоў у кагорту раённых перадавікоў.

Лепшы ў раёне экіпаж

Першага месца сярод старшых камбайнераў і камбайнераў сельскагаспадарчых і іншых арганізацый на ўборцы ўраджаю збажыны ўдастоены экіпаж ААТ “Неўскі-Агра” ў складзе Леаніда Чэрніка (на фота справа) і Віктара Дзешкаўца.

Што да Леаніда Леанідавіча, то ён — адзін з найбольш частых героеў “раёнкаўскіх” рэпартажаў, традыцыя расказваць пра адметныя працоўныя дасягненні механізатара вядзецца не адзін дзясятак год. Сумленны, працавіты, мэтанакіраваны, гатовы спраўна выканаць любую пастаўленую задачу — пра што сведчыць безліч працоўных узнагарод. Ён і ў гэтую ўборачную кампанію таксама прадэманстраваў свае неабсяжныя здольнасці, упартасць да перамогі, прафесіяналізм і выйшаў у пераможцы.

Вядома ж, не сам — разам з памочнікам. Сёлета ім быў Віктар Станіслававіч Дзешкавец, такі ж адказны, надзейны ў любой справе, нацэлены на высокі вынік працаўнік гаспадаркі. Уборачная кампанія гэтага года — далёка не першая ў калгасным жыцці жыхара
аг. Кавалі. Не ўпершыню ён быў і памочнікам камбайнера. Гэты год яшчэ раз пацвердзіў — надзейным.

Матэрыялы падрыхтавала Алена КАРПЕНКА. Фота аўтара, Валянціны МІЛОХІНАЙ, Юрыя ЮРКЕВІЧА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.