У разгары восеньскіх сельгасработ у раёне — капанне бульбы
Па дадзеных райсельгасхарчу, у раёне на раніцу сённяшняга дня быў выкапаны 221 га або 42% ад неабходнага. Накапана 6575 т клубняў пры сярэдняй ураджайнасці 298 ц/га. Ураджайнасць бульбы ў СВК “Гігант”, на долю якога прыходзяцца асноўныя бульбяныя палеткі раёна — 305 ц/га. Земляробы ААТ “Неўскі-Агра” — бяруць з круга 285 ц.
У ААТ “Міхалёўская Ніва” і ААТ “Неўскі-Агра” разам з іншым займаюцца ўборкай цукровых буракоў. Культура ўбрана на плошчы 201 гектар (37%), накапана 6300 тон караняплодаў. Сабраны ўраджай складзіруецца на полі, затым пры дапамозе пагрузчыка перанакіроўваецца на машыны, якія пастаўляюць яго на Слуцкі завод-перапрацоўшчык.
Працягваецца ўборка кукурузы на зялёны корм і сілас. Апошняга ў цэлым па раёне нарыхтавана 52 тысячы тон ці 50% ад задання.
Там, дзе сеялі грэчку, займаюцца зборам ураджаю гэтай культуры.
У ТАА “ВЕОМ” актыўна ўбіраюць гародніну: моркву, сталовыя буракі, капусту. Цыбулю да ўчарашняга дня сабралі.
І, вядома ж, у раёне працягваецца восеньская сяўба. Азімымі культурамі, па апошніх дадзеных, засеяна 4500 гектараў плошчаў. У бліжэйшы час дадзены від работ плануецца завяршыць.
На фотаздымку: капанне бульбы ў ААТ «Неўскі-Агра».
Алена КАРПЕНКА.
Фота Юрыя ЮРКЕВІЧА.
