Учора, у дзень нашага наведвання гаспадаркі, кукурузу на сілас убіралі толькі другі дзень.

Сакавітая зялёная маса адразу з-пад кормаўборачнага камбайна (новенькага, яшчэ няма і году) дастаўлялася з поля ля Чырвонай Дубровы ў траншэю ля майстэрні аг. Іванаўка, дзе падвяргалася трамбоўцы “Амкадорам”. Тэхналогія не дазваляе ў гэтай справе перабояў і прастояў, таму Аляксандра Міхайлавіча Юшкевіча, які днём працаваў на трактары, а сёмай гадзіне вечара мусіў змяніць калега Сяргей Дзмітрыевіч Шынкарэнка. Каб закладка траншэі вялася належным чынам, за гэтым уважліва сочыць адказная за ўлік сабранага ўраджаю (у гэтай пасадзе працавала і на ўборцы зерня) Людміла Аляксандраўна Тарасенка.

На адвозцы зялёнай масы ў гэты дзень было занята пяць МАЗаў, у тым ліку адзін — прыватніка. Кіравалі імі Рыгор Аляксеевіч Дударэнка, Яўген Аляксандравіч Манько, Дзмітрый Сяргеевіч Шырокі (на фота. За кадрам засталіся вадзіцелі Сяргей Анатольевіч Шырокі і Сяргей Міхайлавіч Манько). Пад’язджалі да месца ўборкі грузавікі адзін за адным: кормаўборачная тэхніка КВК-800 пад кіраўніцтвам камбайнера Мікалая Іванавіча Канавалава літаральна бегала па полі (спыніць для фота не рашыліся, надвор’е правакавала на дождж), прычэпы МАЗаў напаўняліся, можна сказаць, імгненна. 

Пад кукурузу ў гаспадарцы занята 750 гектараў, з якіх 300 — на зерне. Сіласу тут плануюць нарыхтаваць 11 тысяч тон. Яшчэ разлічваюць і на закладку сенажу — у гэты дзень Аляксандр Віктаравіч Вежнавец на “Джон Дзіры” падбіраў канюшыну, а маюцца да ўборкі яшчэ і іншыя травы. На паўтарагадавы запас травы — такая задача стаіць перад аграрнікамі, каб быць упэўненымі ў кармавой бяспецы жывёлагадоўлі — разлічваць, па словах дырэктара Алены Васільеўны Пацыенка, пакуль не прыходзіцца:

— Імкнемся, каб выйсці і хоць колькі перабольшыць мінулагодні паказчык нарыхтаванага — 35,6 ц к. адз. на ўмоўную галаву жывёлы. Параўноўваючы з мінулым годам, сёлета на гэтую пару аб’ёмы травянога корму нарыхтаваны большыя (921 тона сена, звыш 10 тысяч тон сенажу), але на ўмоўную галаву — на паўтары кармавых адзінкі меней, бо павялічылі на 300 пагалоўе буйной рагатай жывёлы. Але ж стараемся, працуем у гэтым накірунку.

Зрэшты, дойны статак у гаспадарцы ўжо перавялі на зімовае ўтрыманне, зімовыя рацыёны, таму разлічваюць на больш прыкметную прыбаўку па малаку (на гэтую пару тэмп росту вытворчасці малака 107%). 

Яшчэ адзін немалаважны ў гаспадарцы клопат — восеньская сяўба збажыны. Тым болей, што азімы клінок запланавалі ўнушальны — 500 гектараў пшаніцы, 450 га трыцікале, па 100 — азімых ячменю і жыта, плюс да гэтага — 180 гектараў зялёнаўкоснага жыта на сакавіты корм увесну. У гэтых мэтах актыўна рыхтуюць глебу, а ў дзень нашага наведвання ўжо і пачалі сеяць азімыя.

Алена КАРПЕНКА. Фота аўтара.