Тыдзень “Нулявога траўматызму”: на “Птушкафабрыцы Вішнёўка” прайшоў семінар-вучоба па ахове працы
Семінар-вучоба па пытаннях аховы працы, прамысловай, пажарнай, электрабяспекі з кіраўнікамі і спецыялістамі ЗАТ “Птушкафабрыка Вішнёўка”, прайшоў у рамках тыдня “Нулявога траўматызму”. Арганізавалі і правялі мерапрыемства Бабруйскі міжраённы аддзел Магілёўскага абласнога ўпраўлення Дэпартамента дзяржаўнай інспекцыі працы сумесна з Бабруйскім раённым выканаўчым камітэтам, райкамам прафсаюза работнікаў АПК.
Асноўнай тэмай семінару была канцэпцыя “Vision Zero” або“Нулявога траўматызму”.
Перш чым пазнаёміць спецыялістаў прадпрыемства з гэтай канцэпцыяй, дзяржаўны інспектар міжраённага аддзела Магілёўскага абласнога ўпраўлення Дэпартамента дзяржаўнай інспекцыі працы Людміла Рыбакова зрабіла аналіз няшчасных выпадкаў на вытворчасці, якія адбыліся ў арганізацыях раёна, у тым ліку на птушкафабрыцы, у студзені-жніўні сёлетняга года. Заакцэнтавала ўвагу на найбольш частых прычынах, што прыводзяць да траўмавання і смерці работнікаў, заклікала да строгага выканання патрабаванняў аховы працы на вытворчасці як асновы ў папярэджанні бяды.
Што значыць канцэпцыя “Vision Zero” або “Нулявы траўматызм”, якія яе асноўныя пастулаты — пра гэта прысутным распавяла галоўны спецыяліст упраўлення па працы, занятасці і сацыяльнай абароне Бабруйскага райвыканкама Ганна Белая. У прыватнасці адзначыла, што канцэпцыя — гэта новы падыход да арганізацыі прафілактыкі, які аб’ядноўвае тры накірункі — бяспеку, гігіену працы на рабочым месцы і дабрабыт работнікаў на ўсіх узроўнях вытворчасці. У мэтах развіцця культуры бяспекі і гігіены працы згодна з “Vision Zero”, Міжнародная асацыяцыя сацыяльнага забеспячэння распрацавала практычны інструмент кіравання, выкананне якога дазволіць знізіць вытворчы траўматызм да мінімуму. Спецыяліст упраўлення па працы, занятасці і сацабароне падрабязна спынілася на сямі “залатых” правілах канцэпцыі і адзначыла, што імкненне будаваць на такіх прынцыпах ахову працы залежыць найперш ад кіраўніка арганізацыі і тых, хто за дадзены накірунак дзейнасці адказны. У выніку ж у працэс папярэджання няшчасных выпадкаў уключаюцца ўсе члены калектыву — і ўсе застаюцца ў выйгрышы.
— Жыццё і здароўе — найвышэйшыя каштоўнасці чалавека, — адзначыла старшыня Бабруйскага райкама прафсаюза работнікаў аграпрамысловага комплексу Надзея Дудаль і заклікала дырэкцыю, спецыялістаў прадпрыемства прадпрыняць усё неабходнае па недапушчэнні няшчасных выпадкаў на вытворчасці.
У гэты ж дзень Людміла Рыбакова, Ганна Белая і Надзея Дудаль правялі маніторынг вытворчых аб’ектаў ААТ “Саўгас Кісялевічы” на прадмет выканання норм і патрабаванняў аховы працы, адказалі на хвалюючыя спецыялістаў пытанні, пазнаёмілі іх з канцэпцыяй “Нулявога траўматызму” і заклікалі яе прытрымлівацца.
Алена КАРПЕНКА.