Аграгарадок Кавалі чакае гасцей «Дажынак»
У аграгарадку да гэтай значнай раённай падзеі, якая плануецца адбыцца 8 кастрычніка, актыўна рыхтуюцца, і шмат што ўжо зроблена.
Па словах старшыні Кавалёўскага сельвыканкама Алены Ткачовай, на фінішы работы па аснашчэнні дзіцяча-спартыўнай пляцоўкі на стадыёне аграгарадка, прызначанай для юных вяскоўцаў усіх узростаў. У прыватнасці зроблена пляцоўка для заняткаў па міні-футболе, валейболе, падрыхтавана тэрыторыя для асфальтоўкі баскетбольнай пляцоўкі і пад вулічныя трэнажоры. Наперадзе — усталяванне тут лавачак і добраўпарадкаванне тэрыторыі.
Там жа зроблена пляцоўка для самых маленькіх жыхароў — два дзіцячыя гульнёвыя комплексы (карусель і арэлі-качалка). Плануюць усталяваць яшчэ пясочніцу і падсыпаць дзіцячую пляцоўку.
Адноўлена і часткова пафарбавана жалезабетонная агароджа ў цэнтры аграгарадка, і гэтая работа працягваецца. Абноўлены фасад крамы, выконваецца рамонт унутры пабудовы. Абноўлены фасады сельскага Дома культуры і Кавалёўскай амбулаторыі ўрача агульнай практыкі. У апошняй заменены вокны, адрамантаваны парог, пакладзена новая плітка.
Паклапацілася пра добраўпарадкаванне свайго аб’екта і РУП «Фармацыя». У мясцовай аптэцы заменена агароджа, усталяваны ступенькі, з’явіўся пандус для зручнасці людзей з абмежаванымі магчымасцямі.
Чакае абнаўлення і пляцоўка перад сельскім Домам культуры. Там вядзецца аднаўленне вулічных ліхтароў, тратуарнай пліткі.
Алена КАРПЕНКА. Фота аўтара.