Сёлета пад культуру ў гаспадарцы занята 400 гектараў, на раніцу пятніцы — дзень наведвання гаспадаркі — было ўбрана болей за палову. Па полі ля Пабокавічаў хадзіла тры адзінкі зернеўборачнай тэхнікі. За штурваламі камбайнаў — вопытныя механізатары Дзмітрый Кунец, Сяргей Пархімчык і Пётр Луц. У памочніках  — Сяргей Рыбак, Уладзімір Горбель і Міхаіл Горбель. Перавозку масланасення ад камбайнаў ажыццяўляў вадзіцель Міхаіл Бузак на МАЗе.

— Адначасова з рапсам збіраем ураджай азімага жыта, — кажа галоўны аграном гаспадаркі Сяргей Гаўрыленка. — Вільготнасць у зерня павышаная, таму плюшчым для выкарыстання на корм жывёле. Што да рапсу, то яго ўраджайнасць залежыць ад поля. Ля Дойнічава мелі 18 цэнтнераў з гектара, тут — меней, у сярэднім 14. На гэтым полі шмат “вымачак”, а там, дзе пясок — падпаліла сонцам.

І ўсё ж спадзяванні на лепшы ўраджай Сяргея Іванавіча не пакідаюць: рапсавая “сцяна” выглядае ўнушальнай, ды і догляд пасеваў, па яго словах, быў адпаведным — са своечасовымі падкормкамі, апрацоўкамі ад шкоднікаў і хвароб.   

Сабранае масланасенне гаспадарка пастаўляе ў лік дзяржзаказу, план на сёлета — 540 тон.

Наперадзе ў хлебаробаў “Агракамбіната Бабруйскі” ўборка азімай пшаніцы, якой пасеяна крыху болей за 100 гектараў, усяго ж клінок збожжавых і зернебабовых — азімых і ярыны, тры тысячы гектараў.

Для мэт жніва тут задзейнічана 8 зернеўборачных камбайнаў, у тым ліку два — новых, набытых у мінулым годзе. Людзі для работы на камбайнах падабраны, аднак дэфіцыт механізатарскіх кадраў маецца, таму ў калектыве будуць радыя кожнаму, у чыёй звычцы — сумленна працаваць.

Алена КАРПЕНКА. Фота аўтара.