Перастала біцца сэрца Валерыя Казлова
Сёння, на 72-м годзе, пайшоў з жыцця Валерый Міхайлавіч Казлоў, адказны сакратар Бабруйскага раённага Савета ветэранаў.
На гэтай грамадскай пасадзе, будучы пенсіянерам, Валерый Міхайлавіч працаваў да апошняга свайго дня. Такім ён ужо быў чалавекам — актыўным, цікаўным, з жаданнем дапамагаць іншым, вучыцца самаму. Пра такіх кажуць: “Спакой ім толькі сніцца…”
Нарадзіўся В.М. Казлоў 16 ліпеня 1949 года ў Асіповіцкім раёне, у партызанскай сям’і. Быў актыўным удзельнікам камсамольскага, партыйнага рухаў. Адлік жыцця на Бабруйшчыне пачаў з 1971 года — пасля заканчэння Беларускага палітэхнічнага інстытута быў размеркаваны інжынерам-механікам у Бабруйскую міжрайсельгастэхніку. Ужо з наступнага года ўзначаліў пярвічную камсамольскую арганізацыю прадпрыемства, яшчэ праз некалькі — быў абраны 2-м сакратаром раённай камсамольскай арганізацыі. У паслужным спісе — работа інструктарам арганізацыйнага аддзела Бабруйскага райкама КПБ, дырэктарам вучэбнага камбіната ўпраўлення сельскай гаспадаркі Бабруйскага райвыканкама. З 1996 да 2008 года Валерый Міхайлавіч быў кіраўніком спраў райвыканкама.
Веру ў светлыя ідэалы гэты чалавек пранёс праз усё жыццё, сам няўхісна прытрымліваўся іх. Быў чулым, уважлівым і справядлівым да родных, калег. Не стамляўся дзяліцца жыццёвымі і прафесійнымі напрацоўкамі з маладзейшым пакаленнем.
Такім — светлым, няўрымслівым, з усмешкай на твары і таропкай хадой застанецца Валерый Міхайлавіч Казлоў у памяці калег і тых, хто яго ведаў. Шчыра спачуваем родным і блізкім Валерыя Міхайлавіча.