Памер прыбыткаў, якія сельгасарганізацыі атрымліваюць ад рэалізацыі малака, залежыць як ад аб’ёмаў прададзенай прадукцыі, так і яе якасці.

Рэалізаваць адно і тое ж малако гатункам экстра, вышэйшым ці першым — значыць атрымаць тры заўважна адрозныя сумы. І гэта за адну і тую ж працу, аднымі і тымі ж людскімі рэсурсамі. Згадзіцеся, крыўдна? Вось чаму ў гаспадарках з высокай арганізацыяй вытворчасці прымаюць вычарпальныя меры па недапушчэнні зніжэння якасных паказчыкаў рэалізуемай прадукцыі.

Раённымі сельгасарганізацыямі на першы дзень лютага гатункам экстра рэалізавана 64% ад агульнага аб’ёму пастаўленага на перапрацоўку малака, што прыкметна болей, чым у адпаведны дзень мінулага года (42%). Гатункамі экстра і вышэйшым прадалі дзяржаве 86% прадукцыі, што таксама пераўзышло леташні паказчык.

Выключна ўсё малако найвышэйшай якасцю (экстра) у гэты дзень рэалізавалі СВК “Гігант” і філіял “Харчавік-Агра” ААТ “Чырвоны харчавік АграСэрвіс”, пераважна экстра — філіял “Варатынь” ААТ “БЗТДіА” (83% ) і ААТ “Саўгас Кісялевічы” (59%).

Алена КАРПЕНКА.