Працягваецца раённы этап рэспубліканскай алімпіяды
28-29 лістапада на базе Міхалёўскага ВПК “Дз/сад-СШ” юнакі і дзяўчаты (24 школьнікі) дэманстравалі свае веды па вучэбных прадметах “Біялогія”, “Працоўнае навучанне. Абслугоўваючая праца”, “Працоўнае навучанне. Тэхнічная праца”, “Матэматыка” і “Англійская мова”.
Абсалютнае веданне прадмета “Матэматыка” (дыплом 1-й ступені) пацвердзіў васьмікласнік Павел Барысёнак з Брожскай СШ (настаўнік В.Р. Ёшчык). Ганна Гарбачэўская (9 клас) з Каменскай СШ адзначана дыпломам 3-й ступені па прадмеце (настаўнік Л.В. Зябкіна).
Па прадмеце “Біялогія” ўладальніцай дыплома 3-й ступені стала вучаніца 10-га класа Цялушскага ВПК “Дз/сад-СШ” Лізавета Вавула (настаўнік Н.В. Маліноўская).
Выпускніца Варатынскай СШ Паліна Букіна адзначана дыпломам 2-й ступені па вучэбным прадмеце “Працоўнае навучанне. Абслугоўваючая праца” (настаўнік В.А. Счасновіч), дыпломам 3-й ступені па гэтым жа прадмеце — Дзіяна Тарасевіч, вучаніца 10-га класа Міхалёўскага ВПК “Дз/сад-СШ” (настаўнік Н.М. Катковіч).
Найлепшыя веды па прадмеце “Англійская мова” (дыплом 2-й ступені) прадэманстравала выпускніца Гарбацэвіцкай СШ Лізавета Падаляк (настаўнік А.А. Байко). Дыпломаў 3-й ступені ўдастоены 11-класніцы Туголіцкай СШ Лізавета Зайцава і Ганна Рабава (настаўнік А.І. Філіпчык).
Нашы віншаванні пераможцам!
Алена КАРПЕНКА. Фота носіць ілюстрацыйны характар.
