У СВК “Гігант” капаюць бульбу

Як і штогод, пад культуру тут адведзены значныя плошчы. Сёлета занята 400 гектараў — пераважная частка ад агульнараённых бульбяных палеткаў (544 га). Па стане на раніцу ўчарашняга дня было выкапана 71 га ці 18% ад патрэбы, ураджайнасць, па апошніх дадзеных, — 352 ц/га.

— Магчыма, што калі пяройдзем на палі, дзе пасаджаны “Рэд Скарлет” (галандскі сталовы гатунак, яго ў гаспадарцы болей за палову плошчаў), то ўраджайнасць яшчэ павялічыцца. Але гэта толькі меркаванне…, — не бярэцца сцвярджаць — маўляў, усяму свой час — галоўны аграном гаспадаркі Уладзімір Аляксандравіч Залужны.

Сярод гатункаў таксама айчынныя “Брыз” і “Маніфест”.

Уборка клубняў, як і любая іншая справа, за якую б ні браліся ў “Гіганце”, праходзіць зладжана. На полі — тры бульбаўборачныя двухрадныя камбайны з бакавым падкопам (збіраюцца падключыць чацвёрты), якімі кіруюць Іван Іванавіч Багданаў, Сяргей Іванавіч Дайнека і Аляксандр Паўлавіч Мінькоў. У памагатых кожнаму — памочнік камбайнера, які сочыць за працэсам ажыццяўлення капання. На перавозцы клубняў занята чатыры МАЗы (па машыне — да камбайна, адна — у запасе), іх вадзіцелі Валерый Уладзіміравіч Шэвялёў, Уладзімір Мікалаевіч Шэпялевіч, Сяргей Канстанцінавіч Педан і Мікалай Антонавіч Хурсан.

Як заўжды зладжана арганізаваны і працэс сартоўкі клубняў. Па словах загадчыка бульбасховішча Дзмітрыя Аляксандравіча Шэпялевіча, бульба сартуецца на тры фракцыі: дробную, насенную і буйную харчовую. Першая пасля яшчэ адной сартоўкі выкарыстоўваецца ў асноўным на корм жывёле. Насенная ў секцыі бульбасховішча дастаўляецца ў кантэйнерах, у іх жа і захоўваецца. Харчовыя клубні паступаюць непасрэдна ў секцыю, захоўваюцца там навальным спосабам.

Устаноўку па сартаванні бульбы ў дзень нашага наведвання абслугоўвалі аператары Дзмітрый Аляксандравіч Макаранка і Максім Анатольевіч Гошка, вадзіцелі электрапагрузчыкаў Іван Уладзіміравіч Філіпаў і Аляксей Іванавіч Сысой.

Працуе сартоўка, як паведаміў загадчык бульба­сховішча, ад досвітку да змяркання ў напружаным рэжыме, бо МАЗы з ураджаем падыходзяць адзін за адным. На гэтай пасадзе ён чатыры гады і сёлетнюю бульбу ацэньвае станоўча як па якасці клубняў, так і па ўраджайнасці.

— Надвор’е стаіць спрыяльнае для палявых работ, таму, вядома ж, хочацца і больш выкапаць, — заўважае Уладзімір Залужны, — каб да пачатку кастрычніка гэты від работ і ўвогуле завяршыць.

Між тым, адна справа — атрымаць добры ўраджай, другая, не меньш значная, — яго рэалізаваць, атрымаць прыбытак. Таму пакуль адны ў калектыве заняты ўборкай бульбы, другія — пошукам пакупнікоў на яе, падрыхтоўкай неабходнай для рэалізацыі клубняў дакументацыі.

Алена КАРПЕНКА. Фота аўтара.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.