У «Харчавіку-Агра» завяршылі ўборку збажыны

Філіял “Харчавік-Агра” ААТ “Чырвоны харчавік АграСэрвіс” першым у раёне завяршыў уборку збожжавых культур. З гэтай нагоды калектыў сельгасарганізацыі ўчора наведала дэлегацыя галаўнога прадпрыемства на чале з дырэктарам ААТ “Чырвоны харчавік” Сяргеем Анюхоўскім.

Прамыслоўцы падзякавалі хлебаробам за сумленную працу, лепшым з лепшых уручылі Лісты ўдзячнасці і падарункі. Апошніх удастоіліся пераможцы жніва — экіпажы зернеўборачных камбайнаў у складзе Юрыя Макавеева і Дзмітрыя Бялоўскага (1 месца), Уладзіміра Юшкевіча і Яўгена Леваненкі (2 месца), Віктара Крычко і Анатоля Гацко (3 месца).

Сваёй працай кожны з вас зрабіў падарунак і кіраўніку нашай дзяржавы, бо ён за мэту ставіў — хутчэй убраць хлеб, — адзначыў, звяртаючыся да аграрыяў, Сяргей Анюхоўскі. Улічваючы тое, што ў гаспадарцы ўжо пачалі рыхтаваць глебу пад сяўбу азімых культур, пажадаў плёну ў гэтай рабоце і спрыяльнага надвор’я.

Словы падзякі за якасна сабраны ўраджай зерня выказала работнікам палёў і старшыня Бабруйскага райкама прафсаюза работнікаў АПК Надзея Дудаль. Ад галіновага прафсаюза ўручыла Лісты падзякі і падарункі вадзіцелю Генадзю Дудалю і членам экіпажа зернеўборачнага камбайна — камбайнеру Уладзіміру Юшкевічу і яго памочніку Яўгену Леваненка. Артысты ж мясцовай установы культуры парадавалі хлебаробаў і гасцей урачыстасці цудоўным выкананнем народнай песні.

Алена КАРПЕНКА. Фота аўтара.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.