Сеюць рапс у “Неўскім-Агра”
На полі ля в. Юр’ева ААТ “Неўскі-Агра” ў суправаджэнні галоўнага агранома гаспадаркі Аляксандра Іванавіча Мельніка мы пабывалі ў апошні працоўны дзень мінулага тыдня. Хоць гаварыць так у дачыненні хлебаробаў не зусім карэктна, бо працуюць яны ў гарачыя ўборачную і пасяўную пару без выхадных і дакладна акрэсленага часу.
Азімага рапсу, па словах агранома, запланавана пасеяць 500 гектараў, у тым ліку 300 — на зерне. На дзень пятніцы палова з запланаванага была пасеяна, да 25-га жніўня, у адпаведнасці з тэхналагічнымі патрабаваннямі, збіраліся пасеяць культуру. Падрыхтоўкай глебы пад рапс займаўся Юрый Яўгенавіч Арцёменка, ворыўнымі работамі — Сяргей Анатольевіч Кафідаў. Пад гэтую азімую культуру ў гаспадарцы адвялі 7-8 палёў. 200 га — не меней мінулагодніх плошчаў, будзе засеяна гібрыдамі, якія сёлета далі па 24-25 ц/га.
Тэрмін сяўбы аптымальны, тэхнікі і людзей для яе правядзення дастаткова. Задзел пад будучы ўраджай рапсу зрабілі, як лічаць у гаспадарцы, добры — унеслі фосфарныя і калійныя ўгнаенні, так што глеба, як тое і патрабуецца, уздоблена. Садзейнічае пасяўной і надвор’е.
Алена КАРПЕНКА. Фота аўтара.