Уборка хлябоў у разгары. Разумеючы значнасць пастаўленай перад імі задачы, выкарыстоўваючы пагодлівае надвор’е, людзі на жніве працуюць з поўнай выкладкай, ад раніцы да позняга вечара.

У сваю чаргу прафсаюзы, каб падзякаваць земляробам за працу, заахвоціць аграрыяў на дасягненне высокіх вынікаў, наведваюцца да іх на палі.

Сёння Бабруйскі раён з гэтай мэтай наведала старшыня Беларускага прафсаюза работнікаў культуры, інфармацыі, спорту і турызму Таццяна Філімонава. Лісты падзякі і каштоўныя падарункі з яе рук атрымалі Яўген Барадзін і Васіль Радзіонаў з ААТ “Стасеўка”, Георгій Алтынскі і Аляксандр Лавіцкі з ААТ “Агракамбінат Бабруйскі”, а таксама Аляксандр Рагалевіч і Аліхан Кантаеў з ААТ “Саўгас Кісялевічы”.

Удзячнасць за працу хлебаробам выказалі таксама старшыня Бабруйскага раённага аб’яднання прафсаюзаў Людміла Балакер і начальнік вытворчага аддзела райсельгасхарчу Віктар Садоўскі.

— Ад вашай працы ў гэтыя дні залежыць дабрабыт усёй краіны, кожнага яе жыхара, — адзначыла Таццяна Васільеўна.

Тэкст і фота Алены КАРПЕНКА.
На фота да матэрыялу (злева направа) – Людміла Балакер, Віктар Садоўскі, Яўген Барадзін і Таццяна Філімонава.