18 ліпеня хлебаробаў радавалі не толькі надвор’е, але і святочны настрой. На кромцы поля паблізу в. Савічы, гаспадаром якога з’яўляецца філіял “Харчавік-Агра” ААТ “Чырвоны харчавік АграСэрвіс”, прайшло традыцыйнае свята «Зажынкі» з малебнам, песнямі і захаваннем беларускіх народных традыцый.

Гэта не проста прыгожы тэатралізаваны славянскі абрад, які сваімі каранямі сыходзіць углыб стагоддзяў, а свайго роду ўстаноўка наладзіць усіх удзельнікаў уборачнай кампаніі на плённую працу, падзяка працаўнікам за іх жаданне сабраць як мага больш паўнавартасны каравай.

Адкрыў свята старшыня Бабруйскага райвыканкама Аляксандр Сухадольскі. Аляксандр Мікалаевіч павіншаваў камбайнераў і ўсіх прысутных з пачаткам масавай уборкі ўраджаю, пазначыўшы, што менавіта ад зладжанай работы ўсіх зараз залежыць вынік уборачнай кампаніі. Жнеі, чые песні ў гэты дзень ліліся над полем, у адказ ўручылі старшыні сімвалічны сноп ураджаю 2020 года. А далей наступіў самы хвалюючы момант. Механізатары селі за штурвалы сваіх камбайнаў і адзін за адным вывелі тэхніку на хлебную ніву. Што ж, не падвядзі, надвор’е, хлебароба! У добры шлях, жніво!

Фота Юрыя ЮРКЕВIЧА.