Надышоў час уборкі ўраджаю

Некаторыя сельгасарганізацыі за гэтую справу ўзяліся яшчэ на мінулым тыдні. Рабілі пракосы на пасевах, вялі абкоску палёў, даючы магчы­масць раслінам прасушвацца.

У філіяле «Харчавік-Агра» ААТ “Чырвоны харчавік АграСэрвіс” на дзень пятніцы вялася паўнавартасная ўборка азімага рапсу. На полі заўважылі 5 адзінак тэхнікі. На камбайнах працавалі Юрый Макавееў з памочнікам Дзмітрыем Бялоўскім, Ула­дзімір Юшкевіч з Яўгенам Леваненка і Віктар Крычко з Анатолем Гацко. МАЗамі кіравалі Яўген Дудаль і Віктар Ступень.

— Сітуацыя такая, што верхні ярус струкоў азімага рапсу паспеў, праз дзень-паўтара яны стануць трэскацца і высыпацца. Надвор’е ж наступных дзён і нават тыдня, як свед­чыць прагноз, абяцае быць дажджлівым, таму вырашылі не рызыкаваць, сабраць ура­джай, каб не дапусціць страт, — адзначыў дырэктар філіяла Міхаіл Стрыжэўскі, якога засталі на рапсавым полі. — Ужо колькі машын накіравалі на Бабруйскі завод раслінных алеяў у лік дзяржзаказу (неабходна паставіць 280 тон масланасення). Астатні ўра­джай збіраемся прадаць ім жа: і лагістыка выдатная, і цана задавальняе.

У свіране на мехдвары гаспадаркі ў гэты дзень былі задзейнічаны дзве ўстаноўкі АВС-25, дзякуючы якім — не без удзелу работнікаў — вялася першасная ачыстка рапсу: ад прымясяў і пустазелля. Пасля гэтага чорнае золата накіроўвалася на камбінат хлебапрадуктаў на дасушку, адтуль — на завод раслінных алеяў.

Андрэй Кавальчук, Аляксей Вільчык, Алена Друзік і Наталля Харанека — на ачыстцы насення рапсу

Па стане на раніцу ўчарашняга дня азімы рапс у “Чырвоным харчавіку АграСэрвісе” быў убраны з плошчы 226 га (пасеяна 250 га), намалочана 433 тоны масланасення.

Першасная ачыстка рапсу

Ужо каторы год з перавозкай ураджаю сельгасарганізацыі дапамагае індывідуальны прадпрымальнік Дзмітрый Дзяменцьеў са сваёй тэхнікай. Дзмітрый Максімавіч — з колішніх перадавікоў колішняга “Прагрэсу”, прывык працаваць на сумленне, і цяпер, па словах дырэктара Стрыжэў­скага, з пастаўленай задачай спраўляецца гэтак жа выдатна.

Дзмітрый Максімавіч Дзяменцьеў

Не за гарамі масавая ўборка хлябоў — збажыны і зернебабовых. Іх раёну трэба ўбраць з плошчы 16 тысяч гектараў. Плюс да гэтага — прыкладна 3 500 га кукурузы на зерне. У гаспадарках праводзяць абследаванне пасеваў, сочаць за вільготнасцю зерня, каб пачаць жніво ў аптымальны для гэтага час. У радзе гаспадарак праводзяць абкоску хлебных ніў, зерне сплюшчваюць, закладва­юць у поліэтыленавыя рукавы для працяглага захавання на корм жывёле. На асобных участках, у радзе гаспадарак, праводзіцца дысікацыя пасеваў — апрацоўка гліфасатамі за 10 дзён да пачатку ўборкі, што садзейнічае зніжэнню вільготнасці зерня, барацьбе з пустазеллем.
А ўжо пры вільготнасці 20-22% (падыход, як паведамілі ў райсельгасхарчы, індывідуальны) можна будзе пачынаць масавую малацьбу.
— Да ўборкі збажыны гатовы і сельгастэхніка, і людзі, — адзначыў намеснік начальніка райсельгасхарчу па механізацыі Аляксандр Каўранін. — Да той тэхнікі, што мелася ў раёне для гэтых мэт, сёлета прыбавяцца яшчэ два (набываюцца ў лізінг) зернеўборачныя камбайны КЗС-1218А-1 “Палессе”: у ААТ “Саўгас Кісялевічы” і ААТ “Агракамбінат Баб­руйскі” — усяго іх будзе 55. Гатовы да работы таксама і зернесушыльныя комплексы.


Цяпер галоўнае для сельгасвытворцаў — спрыяльнае надвор’е. Сумныя вынікі, да якіх прывяла непагадзь мінулых выхадных — трывалае пацверджанне таго, наколькі залежыць раслінаводства ад надвор’я. У выніку дажджу з градам, як паведамілі ў райсельгасхарчы, у ноч з суботы на нядзелю ў “Гіганце” адбылася гібель азімага рапсу на плошчы болей за 200 га, пашко­джаны бульбяныя палеткі. У ААТ “Неўскі-Агра” пашко­джана 400 га кукурузы, каля 170 га пасеваў цукровых буракоў, звыш 100 га азімага рапсу.


У цэлым па раёне азімы рапс неабходна ўбраць на плошчы 2 368 гектараў. Убрана, па апошніх дадзеных, 328 га, намалочана 558 тон масланасення. На ўборку культуры адводзіцца прыкладна 10 дзён.
Зерне плануецца дасуш­ваць. У каго такой магчымасці няма — адразу пастаўляюць на ААТ “Бабруйскі завод раслінных алеяў”. У СВК “Гігант” маецца ўласная рапсавая лінія для перапрацоўкі ўраджаю.
— У першую чаргу імкнемся выканаць дзяржзаказ, — гаворыць начальнік вытворчага аддзела райсельгасхарчу Віктар Садоўскі, — а гэта 1 700 тон масланасення.


Працягваецца ў раёне і нарыхтоўка корму, у прыватнасці сена з траў другога ўкосу. На сёння яго маецца звыш 4 000 тон, болей за 61 000 тон пакладзена сенажу. У разліку на ўмоўную галаву жывёлы ў цэлым па раёне нарыхтавана 10,8 ц к. адз., што болей, чым за адпаведны перыяд мінулага года.

Алена КАРПЕНКА. Фота аўтара.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.