У раённых гаспадарках уся ўвага на гэтую пару да корманарыхтоўкі. Касьба, валкаванне, здрабненне травы, заварочванне яе ў палімерную ўпакоўку, перавозка зялёнай масы да траншэй ці іншых месцаў складзіравання корму, на падкормку жывёле — на гэтых работах задзейнічана цяпер шматлікая тэхніка і асноўныя людскія рэсурсы сельгасарганізацый.

Па стане на ўчарашнюю раніцу, як паведамілі ў райсельгасхарчы, у раёне скошана (без уліку зялёнай масы на корм) звыш 10 тысяч гектараў траў першым укосам, на болей чым 9 тысячах гектараў трава ўбрана. Сенажу нарыхтавана амаль 45 тысяч тон пры плане без малога 120 тысяч, сена паўтары тысячы тон пры заданні 14793 т, сіласу — звыш 2 тысяч тон (заданне — 132 тысячы тон), у тым ліку сенажу ў полімерную ўпакоўку — 4967 тон пры заданні 10900.
На ўмоўную галаву жывёлы ў сярэднім па раёне нарыхтавана 7,39 ц к. адз., што некалькі меней (8,20), чым на адпаведную дату папярэдняга года. Між тым, у радзе гаспадарак гэты паказчык значна пераўзыходзіць сярэднераённы: у ААТ “Міхалёўская Ніва” нарыхтавалі звыш 13 ц к. адз., у філіяле “Харчавік-Агра” ААТ “Чырвоны харчавік” — 10 з паловай, у ААТ “Саўгас Кісялевічы” — 12,3 ц к. адз., у ААТ “Аграмашсервіс” — болей за 9 ц к. адз. Меней астатніх на ўмоўную галаву нарыхтавана ў ААТ “Стасеўка” і ў ААТ “Агракамбінат Бабруйскі” — адпаведна 3,70 і 3,78 ц к. адз. Нізкім застаецца паказчык таксама і ў філіяле “Варатынь” ААТ “БЗТДіА” — 5,43 ц к. адз.

***

У ААТ “Агракамбінат Бабруйскі”

Недастатковыя тэмпы нарыхтоўкі травянога корму ў “Агракамбінаце Бабруйскі” выкліканы, як тут патлумачылі, асаб­лівасцю сенажацяў. Траву на сянаж у гаспадарцы выкарыс­тоўваюць пераважна лугавую, а доступ тэхнікі да сенакосаў з-за дажджоў некаторы час быў замаруджаны.
— Яшчэ і зараз выкарыс­тоўваем буксір, — ківае ў бок энерганасычанага трактара першы намеснік дырэктара Мікалай Гертман, якога ў панядзелак засталі на сенакосе паблізу цяпер ужо зніклай вёскі Віктараўка, дзе вяліся касьба, валкаванне, здрабненне і адвозка травы.
Траншэя на тэрыторыі МТК в. Баранавічы, куды складзіравалі травяную масу, пятая па ліку ў гаспадарцы. Да гэтага па яме закрылі на малочна-таварных фермах вёсак Емяльянаў Мост і Багушоўка, дзве — на МТФ в. Дойнічава.
Травянога корму “Агракамбінату Бабруйскі” патрабуюцца ўнушальныя аб’ёмы. Аднаго сенажу звыш 23-х тысяч тон, прыкладна столькі ж сіласу. Але ж і развярнуцца тут ёсць дзе! Апошняе ды наяўнасць мінулагодніх запасаў даюць падставу калектыву разліч­ваць, што кормам пагалоўе будзе забяспечана.
Акрамя таго што вядзецца закладка сенажу на зіму, створаны атрад (касілка і тры тэхнікі на адвозцы), які нарыхтоўвае зялёную масу для штодзённай падкормкі жывёлы.
Спыняць на сенажаці машыны, каб сфатаграфаваць герояў дня, мы, прызнаюся, не адважыліся: занадта рупіліся механізатары і вадзіцелі, каб кампенсаваць вымушанае прамаруджванне. Таму абыхо­дзімся імёнамі гэтых мужных, адданых зямлі, ёю ж загартаваных працаўнікоў сельскай гаспадаркі.
КВК-800 у дзень нашага наведвання кіравалі Аляксандр Гаўрыленка і Віталь Баранаў, на Палессі-250 з КПР-9 — Рыгор Храмеля, на трактары МТЗ-3035 з касілкай КПР-9 — Арцём Астрэйка, на граблях — Андрэй Петрушэня. На перавозцы травяной масы задзейнічаны Аляксандр Булацкі, Сяргей Пархімчык, Пётр Луц, Ілля Шавель, Юрый Лавіцкі, Міхаіл Бузак, Кірыл Дайнека і Андрэй Кузняцоў. Дарэчы, браты апошняга — Анатоль і Юрый Кузняцовы, заняты на трамбоўцы зялёнай масы ў траншэі.

У ААТ “Саўгас Кісялевічы”

Рупіўся, працаваў з аглядкай на дождж у панядзелак і корманарыхтоўчы атрад ААТ “Саўгас Кісялевічы” — работы вяліся на сенажаці паблізу в. Лысая Горка. У траншэю на мясцовай ферме (шостую па ліку ў гаспадарцы) звозілася і нарыхтаваная сянажная маса.
Пабыўшы на сенажаці ў 30-градусную спякоту, без адзінага подыху ветру, зразумела, што зусім не важна, хто колькі скасіў ці звалкаваў травы, хто колькі (больш ці меньш) перавёз зялёнай масы ад камбайнаў. Усе без выключэння гэтыя людзі — героі дня, сама­ахвярныя, адданыя работнікі зямлі, шчырыя і адкрытыя, як сама вёска. А іх праца — сапраўдны подзвіг!

Алена КАРПЕНКА. Фота аўтара.