За пасяўнымі клопатамі ў ААТ “Неўскі-Агра” не забываюцца на яблыневы сад, пад які занята 90 гектараў.

Тэрыторыя ачышчана ад леташняй расліннасці, на пераважнай частцы дрэўцы прарэджаны і пабелены, і гэтая работа працягваецца. Адначасова вядзецца хімапрацоўка сада ад шкоднікаў, хвароб і пустазелля. Займаецца ёй паляводчая брыгада пад кіраўніцтвам агранома Паўла Новікава (на фота да матэрыялу).

— Пупышкі на яблынях шматлікія, прыкметна набухлі, а месцамі і выпусцілі лісце, — дэманструе малады аграном. — Пры адсутнасці маразоў ёсць усе падставы разлічваць на добры ўраджай.

Наш субяседнік — малады спецыяліст, набіраецца вопыту ў гаспадарцы другі год. Родам малады чалавек з Кавалёў, таму жыллёвае пытанне ў яго не ўзнікала. Дакладнымі прафесійнымі планамі на будучыню Павел дзяліцца не стаў, аднак заўважыў, што звязаць жыццё з малой радзімай і ААТ “Неўскі-Агра” — таксама не выключае. Тым болей што адчувае падтрымку і дапамогу калектыву.

Алена КАРПЕНКА. Фота аўтара.