Сустрэча прадстаўнікоў ваенкамата з навучэнцамі бабруйскіх механіка-тэхналагічнага і аўтатранспартнага каледжаў прайшла ў чацвер на базе аб’яднанага ваеннага камісарыяту г. Бабруйска, Бабруйскага, Глускага і Кіраўскага раёнаў. Тэмай размовы стала “Папулярызацыя воінскай службы. Прафілактыка ўхіленняў ад мерапрыемстваў прызыву на ваенную службу”.

— З маладымі людзьмі мы абмеркавалі прэферэнцыі: у сферы адукацыі, сацыяльнай сферы, для тых, хто праходзіць і ўжо прайшоў ваенную службу, — адзначыў начальнік аддзела прызыву на ваенную службу маёр Станіслаў Сіманаў. — Таксама юнакам патлумачаны меры адміністрацыйнай і крымінальнай адказнасці за парушэнне як правілаў воінскага ўліку, так і прызыву грамадзян на ваенную службу.
Што датычыцца цяперашніх мерапрыемстваў прызыву на ваенную службу, то, як было адзначана, яны праводзяцца ў адпаведнасці з Указам Прэзідэнта Рэспублікі Беларусь №55 ад 17 лютага сёлетняга года. На дадзеным этапе праходзяць мерапрыемствы падрыхтоўчага характару — медыцынскія агляды грамадзян.
Дакладныя лічбы набору ў сёлетнюю веснавую кампанію прызыўнікоў з Бабруйшчыны пакуль невядомыя. З гэтай інфармацыяй, а таксама з тым, у якіх вайсковых часцях чакаюць нашых юнакоў, мы пазнаёмiм нашых чытачоў некалькі пазней.

Алена КАРПЕНКА.
Фота аўтара.