У “Гіганце” запрацаваў камбікормавы завод

Буйны інвестыцыйны праект — завод па прыгатаванні камбікармоў магутнасцю 10 тон прадукцыі ў гадзіну — рэалізаваны ў СВК “Гігант”. На гэтыя мэты былі выкарыстаны пераважна ўласныя сродкі гаспадаркі, абсталяванне для завода паставілі з Германіі.

Зерне ў шматузроўневую ўстаноўку падаецца праз завальную яму, узважваецца і накіроўваецца на драбненне. У змешвальніку на другім паверсе да яго, дазавана, дадаюцца іншыя неабходныя кампаненты. Далей атрыманая маса трапляе на наступны ўзровень, на лінію гранулявання. Пасля гэтага ахалоджваецца і паступае яшчэ вышэй — на склад гатовай прадукцыі. І ўжо адтуль, праз самацёкі, — зноўку на 1-шы ўзровень.

Выключна ўсе працэсы вытворчасці камбікорму аўтаматызаваныя, кіруе імі спецыяльна зададзеная камп’ютарная праграма. Заданне неабходных параметраў і кантроль за работай праграмы — на аператарах, якія ажыццяўляюць гэта з пульта кіравання.

З пачатку года завод увялі ў эксплуатацыю. Сёння там вырабляюць камбікармы для буйной рагатай жывёлы, свіней, мюслі для маладняку цялятак — збалансаваны корм для ўласнага пагалоўя і на продаж, па заяўках іншых сельгаспрадпрыемстваў.
Будуючы шматвектарную эканоміку, у “Гіганце” разлічваюць, што новая вытворчасць будзе садзейнічаць паляпшэнню эфектыўнасці гаспадарання сельгаспрадпрыемства, а значыць — дабрабыту людзей, якія тут працуюць.

За пультам кіравання інжынер-тэхнолаг Іван Леанідавіч Казека і аператар Віктар Сяргеевіч Прорвіч.

— Мы працягваем шукаць шляхі для развіцця. Сам я не стамляюся казаць, што, прайшоўшы праз крызіс, мы павінны выйсці з яго загартаванымі, яшчэ больш узмоцненымі, — адзначыў старшыня СВК “Гігант” Міхаіл Пятровіч Левакоў.

Алена КАРПЕНКА. Фота аўтара.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.