На МТК Іванаўка прайшоў Дзень жывёлавода

Дзень жывёлавода прайшоў на малочна-таварным комплексе Іванаўка ААТ “Міхалёўская Ніва” ў гэтую сераду. Удзел у мерапрыемстве прынялі работнікі і спецыялісты комплекса на чале з намеснікам дырэктара ААТ Аленай Пацыенка, а таксама начальнік Бабруйскага філіяла Магілёўскага Дзяржплемпрадпрыемства Раіса Кавалёва. Мэтай Дня было падвесці і абмеркаваць вынікі работы калектыву за студзень, вызначыць задачы і планы на бліжэйшую перспектыву, а таксама спосабы іх дасягнення.

МТК Іванаўка — найбольш паспяховы малочны аб’ект акцыянернага таварыства. Таму сустрэча ў працоўным калектыве пачалася з падзякі работнікам і спецыялістам галіны. Раіса Кавалёва выказала шчырыя словы прызнання ўсім, хто ў нялёгкіх умовах рухае жывёлагадоўлю наперад, дбаючы пра дабрабыт гаспадаркі і раёна.

Па выніках студзеня, як паведаміла галоўны эканаміст ААТ “Міхалёўская Ніва” Марыя Малькова, валавая вытворчасць малака на МТК Іванаўка склала 124,5 т або 142% да ўзроўню папярэдняга года і 101% да задання. З іх 110 тон рэалізавана вышэйшым гатункам. На адну карову за першы месяц года надоена 343 кг, што на 2 кг болей, чым за адпаведны перыяд 2019-га. Сярэдняя цана рэалізацыі малака склала 660 рублёў. Сярэднемесячны заробак па МТК Іванаўка — 825 рублёў. У цэлым жа ААТ “Міхалёўская Ніва”, як было адзначана, займае 3-е месца ў раёне па колькасці надоенага на карову малака, уступаючы ў гэтым філіялу “Харчавік-Агра” ААТ “Чырвоны харчавік” і філіялу “Варатынь” ААТ “БЗТДіА”.

— Выручка ад жывёлагадоўлі — тое, з чаго жыве сельгасарганізацыя пераважную частку года, — заўважыла Алена Пацыенка. — Таму зразумела, наколькі важна для нас не толькі ўтрымліваць дасягнутыя пазіцыі, але і ўпэўнена рухацца наперад.

Галоўны ветурач Уладзімір Ярмольчык

Загадчыца комплекса Ірына Верас назвала імёны работнікаў, чый унёсак у агульную справу найбольш значны — аператары машыннага даення Вераніка Шынкарэнка, Раіса Лук’яненка, жывёлаводы Міхаіл Мельнічонак (вырошчванне цялят да 3-хмесячнага ўзросту, сярэднесутачныя прывагі па выніках студзеня 800 г), Уладзімір Верас (вырошчванне буйной рагатай жывёлы, сярэднесутачныя прывагі — 694 г).

У падвядзенне вынікаў сустрэчы Раіса Кавалёва завастрыла ўвагу калектыву на маючым тут патэнцыяле дасягнуць вышэйшых вытворчых паказчыкаў. У прыватнасці, заклікала праца­ваць над эфектыўнасцю асемянення жывёлы. Выказала ўпэўненасць, што праводзімая ў гэтым накірунку зааветспецыялістамі гаспадаркі работа (створана і працуе група па аднаўленні статку, узмоцнены падыход да лячэння жывёлы) прывядзе да добрага выніку. А гэта, у сваю чаргу, станоўча паўплывае на аб’ёмы надоенага малака.

Алена КАРПЕНКА. Фота аўтара.
На фота да матэрыялу — аператары машыннага даення Алена Чайка і Вераніка Шынкарэнка, загадчыца МТК Ірына Верас, аператар машыннага даення Раіса Лук’яненка, тэхнік-асемянатар Таццяна Кажадуб, галоўны заатэхнік Ніна Крычко, галоўны эканаміст Марыя Малькова, намеснік дырэктара ААТ Алена Пацыенка.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.