Роля рэгіянальных СМІ ў развіцці сацыяльнага партнёрства — пад такой назвай з 26 па 28 студзеня ў Мінску працаваў IV форум, наладжаны Федэрацыяй прафсаюзаў Беларусі для спецыялістаў па сувязях з грамадскасцю раённых, гарадскіх аб’яднанняў прафсаюзаў і журналістаў рэгіянальных сродкаў масавай інфармацыі. Удзел у мерапрыемстве прынялі старшыня ФПБ Міхаіл Орда і Міністр інфармацыі Рэспублікі Беларусь Аляксандр Карлюкевіч.

У межах форуму, з удзелам прадстаўнікоў галіновых міністэрстваў, былі абмеркаваны станоўчыя, з пасылу прафсаюзаў, змены ў абноўленым Працоўным кодэксе, у прыватнасці, змены ва ўмовах выхаду на датэрміновую пенсію людзей, занятых у неспрыяльных умовах працы. Новая сістэма аплаты працы работнікаў бюджэтных арганізацый — Федэрацыя прафсаюзаў распачала работу “гарачых” ліній па праблемных пытаннях —  работа ФПБ у цэлым і па прававой абароне грамадзян. Апошняе, па словах Міхаіла Орды, з’яўляецца адной з галоўных задач, якую вызначыла федэрацыя на будучую пяцігодку.

— У гэтым накірунку нямала зроблена ўжо і ў апошнія гады.  У работнікаў ёсць магчымасць атрымаць бясплатную кансультацыю прафсаюзных юрыстаў. Заключана пагадненне з генеральнай пракуратурай на правядзенне прафсаюзных прыёмаў, што садзейнічае больш хуткаму вырашэнню праблемных пытанняў грамадзян, — адзначыў ён.

Там жа было адзначана, што ў 2019 годзе са 140 судовых спраў 115, дзякуючы ўмяшальніцтву прафсаюзаў, былі выйграны. За 5 год 418 незаконна звольненых работнікаў былі вернуты на працоўныя месцы. Вернута і значная сума нявыплачаных і недаплачаных грашовых сродкаў. Звяртаючыся да спецыялістаў па сувязях з грамадскасцю, журналістаў, старшыня ФПБ заклікаў іх і надалей садзейнічаць дасведчанасці грамадзян у пытаннях дзейнасці прафсаюзаў — умацоўваць прафсаюзную салідарнасць.

Аляксандр Карлюкевіч разам з іншым звярнуў увагу прадстаўнікоў СМІ на павелічэнне на сучасным этапе ролі інтэрнэт-рэсурсаў, а значыць — на больш актыўнае іх развіццё. Адказаў на хвалюючыя рэгіянальную прэсу пытанні.

Удзельнікі форуму змаглі паўдзельнічаць у прафесійных майстар-класах. Работа прадстаўнікоў некаторых СМІ была адзначана ўдзячнасцямі Федэрацыі прафсаюзаў Беларусі.

Алена КАРПЕНКА. Фота аўтара.