Найбольшыя аб’ёмы малака — у «Варатыні», найвышэйшыя ўдоі на карову — у «Харчавіку-Агра»
У раённых сельгасарганізацыях у мінулым годзе надаілі 30 250 тон малака або 100,7% да папярэдняга года. Прадалі — 26 з паловай тысяч тон ці 100,9% да мінулагодняга ўзроўню. Таварнасць малака павялічылі на 0,26 працэнтныя пункты, яна склала 87,5%. За год на карову ў сярэднім па раёне надаілі 3460 кг — на 37 кг болей, чым у 2018-м. Калі аналізаваць у разрэзе гаспадарак, то найвялікшыя аб’ёмы надоенага і рэалізаванага за год малака — у філіяле “Варатынь” ААТ “БЗТДіА” (надоена 7258,6 т або 126% да папярэдняга года, прададзена 6657 т (+130,6%)).
У гаспадарцы другі па велічыні паказчык таварнасці сыравіны — 91,7%, і ўдою на карову ў год — 5256 (+1001 кг) кг.
Высокай ацэнкі заслугоўваюць жывёлаводы філіяла “Харчавік-Агра” ААТ “Чырвоны харчавік”, дзе паказчык удою на карову ў год дасягнуў 6-цітысячнага рубяжу, пераўзыйшоўшы мінулагодні на 434 кг. Вытворчасць малака ў гаспадарцы склала 3450 т або 108% да папярэдняга года. Таварнасць — 92,3% — найвышэйшая ў раёне.
Болей чым у 2018 годзе на карову ў год надаілі малака і ў ААТ “Неўскі-Агра” — 3193 кг (+540 кг). У іншых сельгасарганізацыях удоі знізілі, найбольш прыкметна — у філіяле “Агракамбінат КХП” ААТ “Бабруйскі КХП”, на карову за год тут надоена 3771 кг.
Каб павялічыць вытворчасць малака, у раёне вядзецца немалая работа па нарошчванні пагалоўя буйной рагатай жывёлы. Па словах намесніка начальніка райсельгасхарчу Аляксандра Кісялёва, маецца станоўчая дынаміка ў гэтым плане. На 1 студзеня пагалоўе буйной рагатай жывёлы вызначана лічбай 25 071, што на 1054 галавы болей, чым на пачатку папярэдняга года.
— Планы па вытворчасці малака на сёлетні год паставілі амбіцыйныя, адзначыў Аляксандр Кісялёў, — дасягнуць тэмпу росту ў 125 працэнтаў. Заданні, у тым ліку памесячныя, сельгасарганізацыям даведзены, у калектывах абмеркаваны. Студзеньскае заданне “разбіта” па днях, яго выкананне кожны дзень аналізуем, неадкладна рэагуем на праблемныя сітуацыі, прымаем адпаведныя меры па іх вырашэнні. У гэтыя дні сутачная вытворчасць малака ў раёне складае 110% да адпаведнага перыяду папярэдняга года. Травянога корму для бесперабойнага забеспячэння ім жывёлы ў раёне дастаткова, вядзецца работа па набыцці шротаў, канцэнтраваных кармоў. Шмат увагі надаецца рабоце з навацельнымі каровамі. Словам, працуем і разлічваем на добры вынік, — паведаміў ён.
Сярод станоўчых момантаў галіны ў адыйшоўшым годзе, як было адзначана, — набыццё двух кормараздатчыкаў (у гэтым годзе плануецца купіць яшчэ 5) для прыгатавання кормасумясі. Апошнія прыдбалі за ўласныя сродкі ААТ “Неўскі-Агра” і філіял “Агракамбінат КХП” ААТ “Бабруйскі КХП”. Сярод адмоўнага — недахоп у асобных гаспадарках кадраў спецыялістаў, у тым ліку галоўных, што разам з іншым замінае там рэалізацыі пастаўленых задач.
Алена КАРПЕНКА. Фота аўтара.