Трактары яшчэ ў полі
Каляндарная зіма да апошняга літаральна дня не замінала не зусім звыклым для гэтай пары работам, у прыватнасці, падняццю зябліва — у раёне яго паднята болей за 70% ад патрэбы.
Між тым, у гаспадарках, дзе парадак спраў тэхналагічна вывераны і адшліфаваны, з гэтым клопатам ужо паквіталіся — вызвалілі ад дадатковага цяжару і без таго напружаную вясну. Апошняе датычыцца СВК “Гігант” і філіяла “Харчавік-Агра” ААТ “Чырвоны харчавік”. Больш за 90% паднята зябліва ў ААТ “Неўскі-Агра”, больш за 70% — у Бабруйскім ААТ “Аграмашсервіс”.
Традыцыйна на парадку дня вывазка арганікі на палі. Па апошніх дадзеных, вывезена звыш 100 тыс. тон з 310 неабходных, у тым ліку 42 тыс. тон унесена ў глебу. У лідарах па вывазцы зноў жа “Харчавік-Агра” (каля 80%), “Гігант” — 55% ад патрэбы гаспадаркі (значна ўжо і ўнесена), філіял “Варатынь” ААТ “БЗТДіА” — 40%.
Працягваецца падрыхтоўка насення збажыны да яравой сяўбы. І калі ў цэлым па раёне паказчык ачышчанага складае 60% ад патрэбы, то ў радзе гаспадарак гэтую задачу вырашылі. Цалкам падрыхтаваны насенны матэрыял у “Гіганце”, “Харчавіку-Агра”, “Саўгасе Кісялевічы” і “Стасеўцы”, а таксама на “Птушкафабрыцы “Вішнёўка”.
Іншыя гэтую работу працягваюць, пастаўляючы пробы ў інспекцыю па насенняводству, каранціну і ахове раслін на адпавяданне патрабаванням дзяржстандарту.
Падрыхтоўка насення мнагалетнікаў — у асноўным ачыстка — ажыццяўляецца гаспадаркамі ў ААТ “Магілёўскае насенне траў”.
Актыўна вядзецца ў гэтыя дні і вапнаванне глебы даламітавай мукой. Работа гэтая выконваецца за кошт сродкаў дзяржбюджэту і да канца года павінна быць завершана.
У нашым раёне да вапнавання належыць 1500 гектараў, на 1200 з іх даламіт ужо ўнесены.
Алена КАРПЕНКА. Фото носит иллюстративный характер.