17 лістапада прафесійнае свята адзначаюць работнікі сельскай гаспадаркі і перапрацоўчай галіны. З гэтай нагоды ў сельгаспрадпрыемствах раёна праходзяць ўрачыстасці.

Так, механізатары і вадзіцелі, аператары машыннага даення і жывёлаводы, работнікі паляводчай брыгады, прадстаўнікі адміністрацыі ААТ “Неўскі-Агра” і ветэраны працы сабраліся сёння ў актавай зале Кавалёўскага сельскага Дома культуры на мерапрыемства з нагоды прафесійнага свята — падвялі вынікі напрацаванага з пачатку года, уручылі ўзнагароды тым, чыя работа прызнана найбольш паспяховай, парадаваліся добрай песні.

Віншуючы калектыў са святам, выканаўчы дырэктар Аляксандр Атрохаў падзякаваў работнікам галіны за працу.

— Мы сёлета папрацавалі нядрэнна — значна прыбавілі па зерні збажыны, атрымалі добры ўраджай цукровых буракоў, кукурузнага зерня, болей, чым у мінулым годзе, надаілі малака. І ўсё гэта дзякуючы вашай працы і вашай руплівасці, — сказаў Аляксандр Атрохаў. — Але, каб рухацца наперад — а гэта нам проста неабходна, — планкі на наступны год ставім яшчэ болей высокія. І ўпэўнены — мы іх дасягнем.

Алена КАРПЕНКА. Фота аўтара.