Уборачныя работы працягваюцца
У раёне працягваюцца характэрныя для гэтай пары ўборачныя работы — капанне бульбы, уборка цукровых буракоў, кукурузы на зерне і сілас, вядуцца ворыўныя работы.
Як паведамілі ў райсельгасхарчы, бульба выкапана на плошчы 373 гектары (67 працэнтаў ад патрэбы), накапана болей за 8 тысяч тон клубняў пры сярэдняй ураджайнасці 224,5 цэнтнера з гектара.
Прыкладна столькі ж у працэнтных суадносінах (63% — 392 га) выкапана цукровых буракоў. Накапана без малога 14 тысяч тон караняплодаў, з якіх болей за 9 тысяч тон пастаўлена на перапрацоўку. Ураджайнасць буракоў у гаспадарках розніцца. Калі ў ААТ “Міхалёўская Ніва” з аднаго круга ўзялі па 296 цэнтнераў, то ў ААТ “Неўскі-Агра” прыкметна болей — амаль 416.
Не падвяла сёлета кукуруза. З запланаваных 2270 гектараў на зерне ўбрана трэць плошчаў. Сабрана 6393 тоны зерня, сярэдняя ўраджайнасць па раёне (у бункернай вазе) — 83 ц/га. Пры гэтым найвышэйшая ўраджайнасць дасягнута ў СВК “Гігант” — 111 ц/га, другі па велічыні паказчык (102 ц/га) у філіяле “Варатынь” ААТ “БЗТДіА”, трэці — у філіяле “Харчавік-Агра” ААТ “Чырвоны харчавік” — 94,7 ц/га. У ААТ “Міхалёўская Ніва” і ААТ “Неўскі-Агра”— 80,7 і 78,4 ц/га адпаведна. Найніжэйшая ўраджайнасць у БААТ “Аграмашсервіс” — 38,3 ц/га. Упэўненымі тэмпамі вядзецца нарыхтоўка кукурузнага сіласу — 70 працэнтаў плошчаў ад патрэбы на гэтыя мэты ўжо ўбрана.
У шэрагу сельгасарганізацый працягваюць сеяць азімыя збожжавыя культуры. У цэлым па раёне азімай збажыной засеяна звыш 7 тысяч гектараў, або 70 працэнтаў ад плана.
У “Гіганце”, “Неўскім-Агра” і “Харчавіку-Агра”, разам з іншым, займаюцца падняццем зябліва. У раёне восеньскім ворывам неабходна ахапіць 15 тысяч гектараў.
Алена КАРПЕНКА.