1 кастрычніка сусветнае грамадства адзначыла Міжнародны дзень пажылых людзей. Ён учынены па ініцыятыве ААН у снежні 1990 года. Традыцыйна 1 кастрычніка ў нашым раёне ладзяцца мерапрыемствы, розныя па форме, але адной мэты — падзякаваць пажылым людзям за працу, падараваць ім прыемныя хвіліны адпачынку, прыўнесці ў зачастую аднастайнае жыццё зарад весялосці і бадзёрасці. Апошняе асабліва датычыцца жыльцоў сацыяльных устаноў, дзе, нягледзячы на створаныя камфортныя умовы, дзень для многіх абмяжоўваецца інтэрнацкімі сценамі.

Бабулі і дзядулі аддзялення кругласутачнага знаходжання для грамадзян пажылога ўзросту і інвалідаў Бабруйскага раённага цэнтра сацыяльнага абслугоўвання насельніцтва, куды наведаліся ў панядзелак раённыя артысты — вакальная група “Гармонія” клуба для пажылых людзей “Аптыміст” — і вучні Брожскай сярэдняй школы, з замілаваннем прымалі з рук дзетак кветкі і вырабленыя ўласнаручна паштоўкі, весела падпявалі знаёмыя з дзяцінства заліхвацкія песні, краем хустачак выціралі вочы падчас гучання звязаных з домам і маладосцю мелодый і шчодра адорвалі гасцей падзякамі і апладысментамі.

Каб задаць святочнасць дню, для падапечных установы быў наладжаны “салодкі стол” з сокамі, розных відаў печывам, цукеркамі і галоўным, як мне падалося, для бабуль і дзядуль пачастункам — салодкім духмяным караваем.

Для аматараў гульні ў шашкі — тут актыўнасць праявілі мужчыны — быў наладжаны турнір, па выніках якога пераможцам уручылі ўзнагароды.

Што дзень прынёс пажылым людзям асалоду, выразна гаварылі іх шчаслівыя твары, бясконцыя падзякі і просьбы-пажаданні наведвацца ў госці часцей.

На пазітыўнай ноце прайшло мерапрыемства з нагоды Дня пажылых людзей у сельскім Доме культуры аг. Кавалі, арганізаванае работнікамі ўстановы сумесна з раённым Цэнтрам сацыяльнага абслугоўвання насельніцтва.

За святочным сталом, даўжынёй у палову ўнушальнага фае клуба, сабраліся жыхары аграгарадка, чый узрост дазваляе знаходзіцца на заслужаным адпачынку.

Звярнуўшыся да пажылых людзей, намеснік старшыні райвыканкама Таццяна Варанко пажадала мужчынам і жанчынам галоўнага — здароўя, даўгалецця, паважлівых адносін родных. Бадзёрасці і святочнага настрою пажадалі прысутным таксама і іншыя госці ўрачыстасці.

У пацверджанне таго, што жыццё на заслужаным адпачынку — не прыгавор, а магчымасць выкарыстаць размеранасць дня на карысць здароўю, заняцца любімай справай, праявіць свае творчыя здольнасці і інтарэсы, пажылыя кавалёўцы актыўна падыходзілі да мікрафона, жадалі адзін аднаму здароўя і радавалі прысутных песнямі, вершамі, байкамі. Прычым, гады ў такой справе, як даказалі, — не перашкода. Апошняе пацвердзілі і колішні перадавы камбайнер — 92-гадовы Уладзімір Дзямідавіч Цэдзік, чыёй вайсковай выпраўцы пазайздросцяць многія маладыя, і Надзея Міхайлаўна Блахіна, чый голас, без перабольшання, заслугоўвае самых прэстыжных сцэн, і актыўная ўдзельніца самадзейнасці Валянціна Рыгораўна Герасіменка ды і многія іншыя, хто ў гэты дзень не змог не адгукнуцца на прыцягальныя, звыклыя з маладосці акорды гармоніка.  

Алена КАРПЕНКА. Фота аўтара.