Самым пяшчотным прысвячаецца…

У панядзелак святочнае мерапрыемства з нагоды Дня маці прайшло ў сельскім Доме культуры аг. Хімы. Маладыя матулі з немаўлятамі, з дзецьмі-дашкольнікамі, жанчыны сталага ўзросту і пажылыя — хто шпарка, а хто з асцярогаю — займалі месцы бліжэй да сцэны, дзе іх чакала цудоўная канцэртная праграма з удзелам навучэнцаў раённай дзіцячай школы мастацтваў і салістаў раённага Цэнтра культуры.

Зала не стамлялася пляскаць у далоні маленькім і дарослым артыстам, а тыя — не скупіліся на віншаванні. Праз гумар і песню прызнаваліся матулям у любові, дзякавалі за шчодрыя і пяшчотныя сэрцы, за бясконцыя турботу і клопат, выбачаліся за няпамятлі­васць і няўвагу і зноў дзякавалі, дзякавалі, дзякавалі…

Але самую глыбінную сутнасць маці, яе значэнне ў жыцці чалавека, і ў асаблівасці маленькага, выразна падглядзела-пераняла яшчэ да пачатку ўра­чыстасці. Зала пачала запаўняцца. Хлопчыкі і дзяўчынкі, якія рэпетыравалі на сцэне, адзін за другім з радасцю кідаліся ў абдымкі матуль, якіх заўважалі ў дзвярах. А вочы тых, чыя маці пакуль не з’явілася, а затым — “вось яна, нарэшце прыйшла!”, выразней за словы гаварылі пра значнасць маці ў жыцці чалавека, а разам з тым — і значнасць дня, прысвечанага ёй.

…Пасля канцэрта матулі Хімоўскага сельсавета сабраліся за салодкім сталом.

Алена КАРПЕНКА. Фота аўтара.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.