Міхаіл СТРЫЖЭЎСКІ: «Спрацавалі сёлета вельмі нядрэнна»
Застаўшы Міхаіла Мікалаевіча Стрыжэўскага, дырэктара філіяла “Харчавік-Агра” ААТ “Чырвоны харчавік”, на адным з раённых мерапрыемстваў, не ўтрымаліся, каб не пацікавіцца справамі калектыву, клопатамі на гэтую пару і вынікамі раслінаводчага сезону.
— Міхаіл Мікалаевіч, як, на ваш погляд, папрацавалі сёлета?
— У прынцыпе, спрацавалі вельмі нават нядрэнна. Зерня збажыны атрымалі 2911 тон пры ўраджайнасці 32 ц/га, рапсу намалацілі 493 тоны (24,6 ц/га), азімай сурэпіцы — 44 тоны (22 ц/га). Лічу гэта нядрэнным вынікам, у асаблівасці з тым, што 38 дзён запар глеба не атрымлівала вільгаці — не было дажджу.
Стварылі трывалую кармавую базу для жывёлагадоўлі. З улікам мінулагодняга корму сёння маем двухгадовы яго запас. Да таго ж, пагалоўе забяспечана кормам не толькі пад поўную патрэбу, але і якасным — збалансаваным па бялку, цукру. Таму разлічваем на добрую аддачу. Што да восеньскай сяўбы, то яе ў гаспадарцы даўно завяршылі. Азімыя — як збожжавыя, так і рапс з сурэпіцай пасеялі ў аптымальныя тэрміны. Сёння займаемся ўнясеннем арганічных угнаенняў у глебу і ворыўнымі работамі — падымаем рэшткі зябліва. Даўно ўбралі і кукурузу на сілас, на зерне — таксама некалькі дзён як скончылі і вось ужо два дні як дапамагаем з гэтым суседняй гаспадарцы.
Адначасова дасканала рыхтуемся да зімы. Даводзім усё, як кажуць, да розуму, каб зімоўка для жывёлы прайшла без надзвычайнасцяў.
— На працягу немалога часу калектыў “Харчавіка-Агра” — у лідарах па ўдою малака на карову. У чым сакрэт гэтага? Ці толькі ў дастатковасці якаснага корму?
— Не толькі, хоць гэта і адзін з асноўных складнікаў. Добрых вынікаў наўрад ці атрымаеш без добрага дойнага статку і зацікаўленых кадраў. Асабіста мы з дойным статкам працуем пастаянна, адносімся да гэтага надзвычай сур’ёзна. Схема вырошчвання маладняку ў нас даўно адшліфавана, супрацоўнічаем з кампаніяй “Экамол” па камбікармах КР-1, КР-2. У выніку — прывагі цялят на ферме Савічы дасягаюць практычна па кілаграму — гэта радуе. Што датычыцца кадраў, то людзі ў нас працуюць такія, як і ўсюды. Але ж мы шмат увагі надаем іх навучанню і заахвочваем, у першую чаргу, матэрыяльна. Не агучваючы дакладна лічбы, скажу толькі, што той, хто сёння добра працуе і мае адпаведны вынік, мае сапраўды годны заробак і годны сацыяльны пакет.
Размову вяла Алена КАРПЕНКА.