Сяўба і ўборка ўраджаю ў раёне працягваюцца
На гэтую пару, як паведамілі ў райсельгасхарчы, пасеяна 2050 гектараў азімай збажыны на зерне (пшаніцы і трыцікале) — прыкладна пятая частка ад запланаванага. Найбольш актыўнымі тэмпамі вядзецца сяўба ў СВК “Гігант”, дзе пасеяна 500 з 1350 адведзеных гектараў, у філіяле “Харчавік-Агра” ААТ “Чырвоны харчавік” — пасеяна 360 га пры плане 680. На трэцяй пазіцыі ААТ “Неўскі-Агра” (пасеяна 355 га пры плане 1650).
Працягваецца ўборка цукровых буракоў, вырошчваннем якіх традыцыйна займаюцца дзве раённыя сельгасарганізацыі — ААТ “Неўскі-Агра” і “Міхалёўская Ніва”. У цэлым убрана каля 150 гектараў, або 22 працэнты плошчаў пры сярэдняй ураджайнасці 360 і 330 ц/га адпаведна. З 4655 тон накапаных караняплодаў 3824 тоны ўжо рэалізавана.
У радзе гаспадарак — ААТ “Неўскі-Агра”, СВК “Гігант” і ТАА “ВЕОМ” пачалі капаць бульбу. Усяго ў раёне пад культуру занята 555 гектараў (400 — у “Гіганце”). Па апошніх дадзеных, выкапана 30 з іх, сярэдняя ўраджайнасць па раёну складае 300 ц/га.
Тры гаспадаркі: філіял “Харчавік-Агра”, філіял “Варатынь” ААТ “БЗТДіА”, а таксама філіял “Агракамбінат КХП” ААТ “Бабруйскі камбінат хлебапрадуктаў” уключыліся ў нарыхтоўку кукурузнага сіласу. Ад раённай патрэбы ў 103 тысячы тон закладзена каля 5 тысяч.
Алена КАРПЕНКА.