Малака сталі прадаваць болей
За ўборачнымі работамі ў гаспадарках раёна не забываюцца на жывёлагадоўлю, у прыватнасці, малочную вытворчасць, якая грошы аграрыям прыносіць штомесяца.
У гэтым плане, як адзначылі ў райсельгасхарчы, маюцца станоўчыя зрухі. Па стану на раніцу ўчарашняга дня, па словах намесніка начальніка райсельгасхарчу Аляксандра Кісялёва, рэалізацыя малака дзяржаве, у параўнанні да аналагічнага перыяду папярэдняга года, склала 105 працэнтаў. У жніўні па вытворчасці малака спрацавалі з паказчыкам 103 працэнты да мінулагодняга ўзроўню, па рэалізацыі — 102,5 працэнта. Нарошчваючы на гэтую пару аб’ёмы вытворчасці і рэалізацыі малака, у раёне, па яго словах, прыкладваюць усе намаганні для таго, каб па выніках года яны былі не меньшымі, чым у 2018-м (па выніках васьмі месяцаў — 98 працэнтаў). Відавочныя поспехі ў тых сельгасарганізацыях, дзе, як было адзначана, разумеюць значэнне збалансаванасці рацыёнаў кармлення жывёлы і няўхісна прытрымліваюцца іх. Такі падыход у болей чым паловы раённых гаспадарак, і ў першую чаргу — філіяле “Харчавік-Агра” ААТ “Чырвоны харчавік”. Нядрэнна наладзілі сёлета работу ў гэтым плане ў філіяле “Варатынь” ААТ “БЗТДіА” і ў ААТ “Неўскі-Агра”.
Адначасова ў раёне вядзецца работа па павышэнні якасці рэалізуемага малака. Сёння першым гатункам пастаўляе прадукцыю толькі адна малочна-таварная ферма (філіял “Агракамбінат КХП” ААТ “Бабруйскі камбінат хлебапрадуктаў”), усе астатнія — экстра і вышэйшым.
У клопатах пра зімоўку жывёлы сельгасарганізацыі працягваюць нарыхтоўваць грубыя кармы. Наперадзе — закладка кукурузнага сіласу. Траншэі для гэтых мэт, неабходныя канцэнтраты і тэхніка, як было адзначана, ужо падрыхтаваныя.
Алена КАРПЕНКА.