За ўражаннямі ад маштабнасці жніва — на палі «Гіганта»
Каб уявіць маштабнасць жніва, варта наведацца на палі СВК “Гігант”. У сёлетнюю надзвычай складаную кампанію па ўборцы хлябоў — а гэта адзначае кожны яе ўдзельнік — у вытворчым кааператыве выкарыстоўваюць любую пагодлівую хвілінку, каб уключыцца ў барацьбу за ўраджай. Цяпер ужо ў прамым сэнсе барацьбу: прамаруджванне ў зборы зерня пагражае частковай яго стратай, зніжэннем якасці.
Па гэтай прычыне, а яшчэ таму, што да кожнага віду работ у гаспадарцы прывыклі адносіцца да дробязяў прадумана, у сераду з раніцы, пакуль нябесная канцылярыя разважала-наважвалася, куды наслаць чарговае выпрабаванне ў выглядзе дажджу, на ўборцы трыцікале ад тэхнікі не было дзе яблыку ўпасці. Абмалот збажыны вёўся чатырма высокавытворчымі камбайнамі “Лексіон” пад кіраўніцтвам вопытных механізатараў — Алега Вяроўкіна, Уладзіміра Зуба, Валянціна Тарасевіча, Юрыя Антоненка. Каб не дапускаць замінкі з разгрузкай бункера і не губляць каштоўныя хвіліны, да кожнага камбайна быў прыстаўлены вадзіцель з МАЗам — Аляксандр Цэд, Анатоль Семенчукоў, Мікалай Хурсан, Валерый Шавялёў. Абмалочаная збажына ў выглядзе саломы тут жа прэсавалася, упрыгожваючы поле ладнымі цюкамі, і звозілася да месца складзіравання.
Аляксандр Зайцаў з вучнем На прэсаванні саломы Аляксандр Клімовіч Аляксандр Цэд на МАЗе Алег Вяроўкін на “Лексіоне”
Паглядваючы на сінеючае неба, хлебаробы рупіліся, тым болей што ўборку трыцікале — пад культуру было занята 200 га, — у гэты дзень разлічвалі завяршыць. Што да ўраджайнасці азімай культуры, то яна, па словах галоўнага агранома Уладзіміра Залужнага, хоць і не зусім тая, на якую разлічвалі, але прыкметна вышэй за мінулагоднюю.
— Не 60, як разлічвалі, пад што зрабілі задзел, — заўважае ён, — але і за гэта вялікі дзякуй. Цяпер галоўнае — сабраць зерне і ўзяцца за новую культуру. Якую дакладна — залежыць зноў жа ад надвор’я. Хутчэй за ўсё пшаніцу. Яна ў нас азімая, трэба б убраць, паспець падрыхтаваць насенне да продажу. Але і зернебабовая група, гарохі, ужо падыйшла. Праўда, культура гэта своеасаблівая, для зручнасці ўборкі трэба каб падсушылася на карані. Так што, паўтаруся, будзем дзейнічаць па абставінах, па надвор’і.
Алена КАРПЕНКА. Фота аўтара.
