У гарачую пару — гарачыя справы

Бабруйскае ААТ “Аграмашсервіс” уключылася ў нарыхтоўку травянога корму

Работы тут вядуцца не першы дзень, таму на раніцу паня­дзелка (менавіта тады мы наведалі гаспадарку) ужо меўся і вынік — падрыхтаваная да закрыцця сянажная траншэя на малочна-таварнай ферме Хімы, а таксама распачатая да закладкі там жа другая.

— Трамбоўка зялёнай масы не спыняецца і ноччу, — адзначыла аграном Таццяна Падшывалава. — стараемся дзейнічаць па плану, не парушаць тэхналогій.

Аляксандра Кісялёва на трактары “МТЗ-3022” у начную змену змяняе Віталь Падшывалаў на “МТЗ-3522”. Падбуртоўвае травяную масу Валерый Падшывалаў на “Амкадоры-342”. Пасля таго як на Хімах неабходныя аб’ёмы корму будуць занатаваны, уся гэтая тэхніка перамесціцца на МТФ Слабада, дзе свайго часу чакаюць падрыхтаваныя сянажныя траншэі.
Там жа, на МТФ Хімы, прыкмецілі і рулоны сена.
— Яно таксама ўжо сёлетняе, — пацвердзіла субяседніца, — звозяць з урочышча Стоўпіцкае.
Нарыхтоўку сянажнай масы ажыццяўляў Іван Макееў на новенькім (працуе другі сезон) корманарыхтоўчым комплексе “Палессе” (КВК-800), за перавозкай травы засталі Івана Еўстратчыка на МАЗе. Іх тэхніка якраз мяняла месца дыслакацыі — перамяшчалася з сенажаці ля вёскі Цярэшкава на поле паблізу населенага пункта Вялічкава. Настрой, па словах нарыхтоўшчыкаў корму, у іх выдатны — абы б тэхніка не падвяла.
Усяго ў гэтае лета аграрыям Бабруйскага ААТ “Аграмашсервіс” неабходна пакласці 6 тысяч тон сенажу і 650 тон сена, ды пры тым — якасных.
— Людзі разумеюць важнасць пастаўленай задачы, — заўважыў галоўны аграном Андрэй Чорны, — таму нараканняў на іх работу няма.

Аляксандр Кісялёў

Валерый Падшывалаў

“Корманарыхтоўка — асноўная задача на гэтую пару, — падкрэсліла начальнік вытворчага аддзела ўпраўлення па сельскай гаспадарцы і харчаванні райвыканкама Жана Жукоўская. — па тэрмінах правядзення кампанія апераджае папярэдні год”.
На гэты час, як яна адзначыла, у цэлым па раёне скошана болей за 30 працэнтаў ад запланаваных плошчаў, болей за палову ад скошанага — звезена з сенажацяў. Нарыхтавана 15 тысяч тон сенажу пры плане 97 тысяч тон і каля 400 тон сена пры плане 8700. Сена, па словах Жаны Жукоўскай, няшмат, таму што з траў першага ўкосу ў гаспадарках імкнуцца закласці як мага болей сенажу. Маецца ўжо таксама і адна тысяча тон сіласу (філіял “Агракамбінат КХП” ААТ “Бабруйскі камбінат хлебапрадуктаў”).
Шэраг сельгасарганізацый: СВК “Гігант”, ААТ “Стасеўка”, “Аграмашсервіс”, “Саўгас Кісялевічы” і “Неўскі-Агра”, рыхтуюць корм у тым ліку ў полімерную абалонку, што значна павялічвае (пры ўмове тэхналагічнасці працэсу) яго якасныя характарыстыкі.
Гаворачы пра ўраджайнасць сенакосаў і пашы, Жана Жукоўская адзначае, што ў гаспадарках, дзе клапоцяцца пра іх паляпшэнне — своечасова перазалужваюць і падсейваюць, трава ў гэтым годзе нядрэнная (СВК “Гігант”, філіял “Харчавік-Агра” ААТ “Чырвоны харчавік”, апошнім часам — “Агракамбінат КХП”). Той жа ААТ “Аграмашсервіс”, па яе словах, сёлета набыў у “Гіганце” насенне мнагалетнікаў, заклаў уласныя насенныя ўчасткі з тым, каб у наступным годзе правесці перазалужванне.
Працягваюцца ў раёне і работы па доглядзе пасеваў: хімпраполка, фунгіцыдная апрацоўка азімага рапсу, яравой збажыны, кукурузы.

Іван Макееў

Іван Еўстратчык

Вядома, што зладжанасць любой сельскагаспадарчай кампаніі нашмат залежыць ад наяўнасці неабходнай тэхнікі. У нашым раёне, як паведаміў намеснік начальніка райсельгасхарчу Аляксандр Каўранін, тэхнікі, каб своечасова — да 15 чэрвеня, завяршыць касьбу траў першага ўкосу і нарыхтоўку з іх сенажу і сена, дастаткова. Гэта і 30 кормаўборачных камбайнаў, 41 трактарная касілка, 26 грабель, 31 прэс-­падборшчык для сена і саломы, 5 камбінаваных прэс-падборшчыкаў, з якіх два набылі непасрэдна да сёлетняй корманарыхтоўкі (ААТ “Неўскі-Агра” і філіял “Харчавік-Агра”). Такія ж прэсы, здольныя адразу падбіраць, здрабняць траву, абмотваць у сетку і заварочваць у стрэч-плёнку, маюцца ў СВК “Гігант”, ААТ “Аграмашсервіс” і філіяле “Варатынь” ААТ “БЗТДіА”. У гаспадарках, дзе іх няма (ААТ “Стасеўка”, “Саўгас Кісялевічы”), ёсць абмотчыкі рулонаў. На невялікія аб’ёмы, як было адзначана, і гэтай тэхнікі дастаткова, каб своечасова справіцца з задачай — нарыхтаваць корм па прагрэсіўных тэхналогіях.


Алена КАРПЕНКА. Фота аўтара.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.