Спякота — не перашкода для земляробаў “Гіганта” (фота+відэа)

Як заўжды, высокаарганізавана, па-гаспадарску праходзіць корманарыхтоўчая кампанія ў СВК “Гігант”. Каб быць з ураджаем, выключна ўсе травы тут своечасова, у адпаведнасці з тэхналагічнымі нормамі, падкармілі, дзе мелася патрэба — падсеялі. І вось ён вынік: валкі, якую б сенажаць не ўзялі — не пераступіць!

— Травы першага ўкосу выключныя, — адзначае галоўны аграном Уладзімір Аляксандравіч Залужны. — Усё гэта дзякуючы людзям і надвор’ю. Выканалі тэхналагічныя патрабаванні. Хоць і нялёгка прыйшлося, але набылі азотныя мінеральныя ўгнаенні і падкармілі траву. Плюс да гэтага дожджыкі прайшлі.

Калі не здарыцца надзвычайшчыны з надвор’ем, то да 15-16 чэрвеня, як і запланавалі, касьбу траў першага ўкосу і нарыхтоўку сенажу і сена з іх у вытворчым кааператыве разлічваюць завяршыць. “Усё на гэта пастаўлена, і ўсе на гэта працуем”, — гаворыць галоўны аграном.

З траў першага ўкосу тут запланавалі нарыхтаваць 7-8 тысяч тон сенажу і 200-300 тон сена. З гэтай задачай, як адзначаюць, намераны справіцца. Зрэшты, тысяча тон сена засталася з мінулага года (усяго на зімоўку яго  патрабуецца 1500-2000 тон).

Не загадваючы надалей, гэтымі днямі ў гаспадарцы імкнуцца пакласці максімальныя аб’ёмы грубага корму, косяць усюды, дзе магчыма.

— Калі дажджоў не будзе, травы б ізноўку варта падкарміць, — разважае Залужны, — але той азот, што ёсць, беражэм для кукурузы, каб мець зерне.  

А пакуль у СВК актыўна закладваюць сянажную масу — у траншэі і рулоны (у дзень нашага наведвання — на МТК М. Бортнікі), займаюцца прэсаваннем і звозкай сена да месца складзіравання.

З улікам таго што частка тэхнікі задзейнічана ў мерапрыемствах па ахове раслін, а адлегласць ад сенажаці, дзе вядзецца нарыхтоўка сенажу, да траншэі М. Борнікаў немалая, на адвозцы сянажнай масы адчуваецца некаторае напружанне.

 — Гэта з’ява часовая і апраўданая, — заўважае галоўны інжынер Ігар Міхалёнак. — Корм з дадзенай травасумясі асабліва спажыўны для дойнага статку, таму і возім яго не на Бірчу, куды бліжэй, а на МТК. У цэлым жа тэхнікі для своечасовага завяршэння корманарыхтоўкі, па словах Ігара Аляксеевіча, дастаткова. На касьбе траў задзейнічаны “Палессе” з касілкай КПР-9, трактар МТЗ 1221 з касілкай КПП-3,5 “Пціч”, у дзеянні дзве набытыя сёлета навясныя трохмятровыя касілкі замежнай вытворчасці — іх работай задаволены — з трактарамі МТЗ 1221. Падбор і здрабненне валкоў на зялёную масу ажыццяўляюць “Джон-Дзір” і “Ягуар”. Яшчэ адзін “Джон-Дзір” у агрэгаце з прэс-падборшчыкам-абмотчыкам “Фьюжн” занатоўвае масу ў рулоны. Сена прэсуе тэхніка бабруйскай вытворчасці. 

Графік работы механізатараў у гарачую пару корманарыхтоўкі — з 7 да 20 гадзін. Той, хто косіць, можа затрымацца і пазней: зрабіць зачын на наступны дзень. У мэтах забеспячэння камфортных умоў працы на поле двойчы прывозіцца гарачае харчаванне. Кормаўборачныя комплексы забяспечаны кандыцыянерамі, што ў цяперашнюю спякоту асабліва да месца. 

Ёсць у работнікаў і матэрыяльная заахвочанасць. Распрацаваныя нарматывы, у залежнасці ад віду работ, дазваляюць пры якаснай закладцы корму павялічыць заробак да двух разоў.

— Але ж, паўтаруся, пры ўмове, што чалавек заступаў і завяршаў работу ў адпаведнасці з графікам і сумленна працаваў, — удакладняе Ігар Аляксеевіч.

Чым раней у “Гіганце” скончаць з першым укосам, тым раней возьмуцца за другі і тым павялічаць шанцы завяршыць нарыхтоўку сенажу і сена да пачатку яшчэ адной значнай сельскагаспадарчай кампаніі — уборкі збажыны. Загадваць наперад тут звычкі не маюць, аднак задачу такую ставяць і ўпэўнена да гэтага імкнуцца.

Алена КАРПЕНКА. Фота аўтара.

Відэа Сяргея БАГДАНАВА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.