У “Гіганце” завяршылі сеяць сою
СВК “Гігант” — адзіная ў раёне гаспадарка, дзе займаюцца гэтай надзвычай каштоўнай бабовай і алейнай культурай. Вырошчваючы сою чацвёрты год запар, у “Гіганце” з уласнага вопыту зразумелі — расліна прад’яўляе надзвычай высокія патрабаванні да агратэхнікі, празмерна патрабавальная да тэрмінаў апрацоўкі, патрабуе да сябе пастаянных уважлівых адносін. Але ж і ўраджаі пасля гэтага дае адпаведныя. Да прыкладу, у мінулым годзе ўраджайнасць соі ў СВК, у вазе да дапрацоўкі, склала без малога 20 ц/га (намалацілі звыш 456 тон), у 2016 годзе — болей за 24 ц/га (169 тон). І гэта пры тым, што соя — каштоўны кармавы інгрэдыент у сферы жывёлагадоўлі: якасная крыніца бялку ў камбікармах. На думку вучоных, гэтая культура лепей іншых здольна забяспечыць паўнавартасныя рацыёны кармлення жывёлы, а значыць — атрымаць прыбыткі ад малака і мяса.
Сёлетні план сяўбы ў 300 гектараў у СВК “Гігант” асвоілі за тыдзень, зрабіўшы нязначны перапынак на дождж. Перад працягам пасяўных работ, па словах галоўнага агранома Уладзіміра Залужнага, глебу паўторна рыхтавалі — праходзіліся шыроказахопнай бараной, каб падабраць пустазелле і яшчэ раз выраўняць паверхню.
— На асобных палях бараной прайшліся нават тройчы, — канстатуе Уладзімір Аляксандравіч. — Стручкі ў соі размяшчаюцца нізка, і калі поле не будзе роўным, пры яго ўборцы магчымы значныя страты.
Карэспандэнты “раёнкі” паназіралі за сяўбой соі ў пятніцу. У той дзень яе сеялі двумя агрэгатамі. Ля вёскі Азёры гэтую работу выконваў механізатар Алег Уладзіміравіч Вяроўкін на трактары МТЗ-3522 у агрэгаце з сеялкай АКПМ-6 (на фота). Вячаслаў Іванавіч Зуб сеяў культуру на Джон Дзіры.
Дзмітрый Ігаравіч Тарасевіч упэўнена манеўраваў пагрузчыкам Manitou 735.
Улічваючы тое, што соя патрабуе пільнага догляду, у гаспадарцы, па словах галоўнага агранома, ужо набылі і неабходны гербіцыд для яе апрацоўкі, каб своечасова ўнесці на пасевы.
Мяхі з насеннем падвозіў на МАЗе Сяргей Канстанцінавіч Педан . 
Сяргей Іванавіч Дайнека займаўся міжраднай апрацоўкай бульбы (яе ў гаспадарцы таксама пасадзілі).
З сабранага ўраджаю 60-65 тон пакідаюць у “Гіганце” на насенне, астатнія выкарыстоўваюць у якасці сыравіны для ўласнага камбікормавага завода. Сучасны завод гаспадаркі аснашчаны спецыяльным абсталяваннем, праходзячы праз якое соя губляе шкодныя рэчывы, і на выхадзе атрымліваецца прадукт — выдатны складнік камбікармоў для рознага віду жывёлы, рознай узроставай групы.
— Пасеялі сою ў аптымальны час па вільготнасці і тэмпературы глебы,— разважае Уладзімір Залужны, — праз дзён 7-10 чакаем усходы, а цяпер асноўнае — догляд пасеваў і падрыхтоўка да нарыхтоўкі травянога корму.
Тэкст і фота Алены КАРПЕНКІ.
