Варатынцы сеюць кукурузу

Не першы тыдзень вядзецца пасяўная ў філіяле “Варатынь” ААТ “БЗТДіА”. У гаспадарцы своечасова пасеялі раннюю ярыну, на гэтую пару ўжо і 208 гектараў адналетніх траў на зялёны корм жывёле. Апошнімі збіраюцца засеяць яшчэ прыкладна 100-120 гектараў.

Цяпер жа ўся ўвага скіравана на сяўбу кукурузы, пад якую тут адвялі адну тысячу гектараў. На зерне — а гэта 150 га — культуру ўжо пасеялі, цяпер займаюцца сяўбой на зялёную масу. Насеннем, па словах дырэктара Ула­дзіміра Давыдзенкі, гаспадарка цалкам забяспечана, амаль усё яно — замежнай вытворчасці, высокіх пасяўных якасцяў. Зерне кукурузы ў філіяле «Варатынь» выкарыстоўваюць на мэты жывёлагадоўлі. Звычайна некаторую частку заплюшчваюць, астатняе дасушваюць, каб потым гатаваць з яго камбікорм на ўласным заводзе.

Немалую падтрымку, як тут адзначылі, сельгасарганізацыі аказваюць прамыслоўцы. Вось і да сёлетняй сяўбы галаўное прадпрыемства — ААТ «БЗТДіА», дапамагло з набыццём насення, мінеральных угнаенняў, запчастак для сельгастэхнікі.

— Усё б добра, каб не адсутнасць дажджоў, — разважае галоўны аграном гаспадаркі Аляксандр Аляксандравіч Парахневіч, пакуль едзем на кукурузнае поле. — З надзеяй чакаем яго штодня, але пакуль дарэмна.

На недахоп вільгаці ўказвалі і клубы пылу, што суправаджалі пасяўную тэхніку, — трактар «МТЗ-1221» у агрэгаце з замежнай сеялкай дакладнага высеву «Квернеланд оптыма», якімі запраўляў вопытны механізатар Раман Аляксанд­равіч Цэдранкоў.

Задача палявода Канстанціна Мікалаевіча Фіневіча падчас сяўбы — загружаць кукурузнае насенне з прычэпа трактара ў адпаведныя адсекі на сеялцы. На падвозцы насення ў дзень нашага прыезду быў заняты Уладзімір Віктаравіч Вараб’ёў.

Алена КАРПЕНКА. Фота аўтара.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.