Немалы фронт работ па добраўпарадкаванні выкананы ў мінулую суботу ў пас. Глуша. Здаецца, зусім нядаўна мы пісалі, што ў парку для адпачынку аднаго з найбуйнейшых і добраўпарадкаваных населеных пунктаў раёна з’явілася сучасная дзіцячая пляцоўка, як новая прыемная навіна! Да дзіцячай далучылася спартыўная, прызначаная для падлеткаў і дарослых.

— Набылі абсталяванне за прэмію ад перамогі ў рэспуб­ліканскім спаборніцтве яшчэ ў мінулым годзе, — дзеліцца старшыня Глушанскага сельсавета Марыя Сушчанка. — Але на зіму ставіць не сталі, каб зра­біць гэта пры спрыяльным надвор’і, няспешна і якасна. Цяпер у нашым парку могуць актыўна, з цікавасцю і карысцю адпачываць усе групы насельніцтва — іх да гэтага заклікаем.

Зрэшты, у хуткім часе на вуліцах пасёлка з’явіцца 20 новых лавак для адпачынку і столькі ж сучасных сметніц. Па словах старшыні, усё гэта для таго, каб населены пункт вабіў жыхароў і гасцей чысцінёй і ўтульнасцю.

Устаноўкай спартыўнай пляцоўкі займаліся работнікі сельсавета і мясцовага Дома культуры. Матэрыял для яе замацавання (будаўнічыя сумясі) вылучыла размешчанае на тэрыторыі пасёлка ПУП “Кампанія Дар-Форт”. (Чым не прыклад станоўчага ўзаемадзеяння дзяржавы і бізнесу?! Але гэта ўжо, як кажуць, другая гісторыя…).

Алена КАРПЕНКА.