На мінулым тыдні гаспадаркі раёна прыступілі да сяўбы ранняй ярыны — збожжавых і зернебабовых культур. Па стану на ўчарашнюю раніцу гэтая работа вялася ў 7 з дзевяці раённых сельгасарганізацый. У асноўным сеялі авёс, а ў радзе гаспадарак — філіялах “Варатынь” ААТ “БЗТДіА” і “Харчавік-­Агра” ААТ “Чырвоны харчавік”, а таксама ААТ “Міхалёўская Ніва” — ужо і ячмень. На ўчора ў цэлым па раёне было пасеяна 850 гектар з 7700 га ранняга яравога кліну.

“Вільготнасць глебы для сяўбы гэтых культур аптымальная. Яе тэмпература на пачатку пасяўных работ хоць і была некалькі ніжэйшай за тую, што патрабуецца, аднак сонца з кожным днём грэла мацней”, — адзначыла начальнік вытворчага аддзела ўпраўлення сельскай гаспадаркі і харчавання райвыканкама Жана Жукоўская. Па яе словах, на сяўбу ранняй ярыны, у адпаведнасці з планам, адведзена два тыдні. У дачыненні нашага раёна гэта азначае, што адсеяцца трэба будзе да пачатку другой дэкады красавіка.

5 гаспадарак таксама прыступілі да падкормкі азімых збожжавых культур і рапсу. Час для гэтага аптымальны. У бліжэйшыя дзень-два, як было адзначана, да дадзенага віду работ падключацца ўсе сельгасарганізацыі. Азотныя мінеральныя ўгнаенні для першай падкормкі ў раёне маюцца.

Алена КАРПЕНКА.