Выплата зарплаты, павелічэнне закупачных цэн на малако… З чым звярталіся жыхары Бабруйшчыны да кіраўніка дзяржавы
Сярод пытанняў, якія паступілі ад насельніцтва нашай краіны падчас “Вялікай размовы з Прэзідэнтам” — сустрэча А. Лукашэнкі з прадстаўнікамі грамадскасці і экспертнай супольнасці адбылася 1 сакавіка — і два пытанні ад жыхароў нашага раёна.
У прыватнасці, шматдзетная маці з аг. Кавалі паскардзілася на недобрасумленны падыход мясцовага сельгаспрадпрыемства да выплаты заробку працаўнікам і дзяржаўнай дапамогі на дзяцей і папрасіла Прэзідэнта пасадзейнічаць у вырашэнні праблемы.
Як стала вядома, жанчына знаходзіцца ў адпачынку па доглядзе дзіцяці да трох год, на яе выхаванні знаходзяцца чацвёра непаўналетніх. Акрамя дзяржаўнай дапамогі на іх (у тым ліку на дзяцей ва ўзросце ад 3 да 18 год), грамадзянка атрымлівае аліменты ад мужа — працаўніка ААТ “Неўскі-Агра”. З улікам таго што і мужавы выплаты, і дзяржаўную дапамогу на дзяцей жанчыне выплачвае мясцовая гаспадарка (па месцы працы заяўляльніцы), зразумела, што любое парушэнне тэрмінаў выплаты грошай там негатыўна адбіваецца на планаванні сямейнага бюджэту.
Пасля вывучэння сітуацыі стала вядома, што тэрмін выплаты заробку ў ААТ “Неўскі-Агра”, згодна з дагаворам, устаноўлены не пазней 30 чысла месяца, наступнага за справаздачным. У парушэнне артыкула 73 ПК і пункта 3.16 калектыўнага дагавору таварыства заробная плата за снежань 2018 года работнікам гаспадаркі была цалкам выплачана 31 студзеня. Заробак за студзень 2019 года — ва ўстаноўленыя тэрміны. У мінулым годзе, як сведчаць статыстычныя дадзеныя, пратэрмінаваная запазычанасць па выплаце заробнай платы ў таварыстве была дапушчана адзін раз — па стане на 1 мая (пагашана 4 мая). Тэрмінаў несвоечасовай выплаты дзяржаўных дапамог у ААТ “Неўскі-Агра” ні ў 2018 годзе, ні з пачатку бягучага года ўстаноўлена не было.
Яшчэ адно пытанне паступіла ад жыхаркі аг. Леніна. Жанчыну цікавіць, калі плануецца павелічэнне закупачнай цаны на малако для насельніцтва.
Заяўляльніцы патлумачана, што гэтым часам дзяржаўнае рэгуляванне цэн на малако-сыравіну, якое закупляецца перапрацоўчымі арганізацыямі, не ажыццяўляецца. Пры гэтым закупачныя цэны на малако-сыравіну, у тым ліку якое закупляецца ад насельніцтва, устанаўліваюцца сыходзячы з попыту і прапановы ва ўмовах свабоднай канкурэнцыі.
У прыватнасці, ААТ “Бабушкина крынка” — кіруючая кампанія холдынгу “Магілёўская малочная кампанія “Бабушкина крынка” ўстаноўлена закупачная цана на малако, якое закупляецца ад насельніцтва, у памеры 495,0 рублёў за 1 тону без падатку на даданую вартасць. ААТ “Молочные горки” ўстаноўлена закупачная цана на малако, якое закупляецца ад насельніцтва, у памеры 500,0 рублёў за 1 тону без падатку на даданую вартасць.
У мэтах дасягнення роўных эканамічных умоў гаспадарання ў Магілёўскай вобласці з іншымі рэгіёнамі краіны і фарміравання канкурэнтных цэн на малако-сыравіну, малакоперапрацоўчымі арганізацыямі вобласці прымаюцца рашэнні аб павелічэнні закупачных цэн на малако-сыравіну з улікам паказчыкаў эфектыўнасці работы арганізацый.
Падрыхтавала Алена КАРПЕНКА.