Святлана Паця — лепшы банкаўскі работнік

Сярод людзей, якія забяспечваюць дзейнасць народнай гаспадаркі нашага раёна, нямала тых, хто сваёй працай неаднойчы даказвалі і даказваюць — яны на сваім месцы: іх унёсак у агульную справу максімальны ад магчымага. І гэта дзякуючы не толькі прафесійнай дасведчанасці чалавека — хоць апошняе значыцца на першым месцы,  але яго адносінам да даручанага, прыроджаным і прывітым духоўным якасцям.

Да ліку такіх людзей належыць і Святлана Леанідаўна Паця, спецыяліст па аказанні рознічных банкаўскіх паслуг аддзела продажу рознічных банкаўскіх прадуктаў і паслуг цэнтра рознічнага бізнэсу філіяла №703 ААТ “АСБ Беларусбанк”,  аддзялення №703/12 у аг. Гарбацэвічы, якая па выніках работы за 2018 год прызнана пераможцам раённага спаборніцтва ў намінацыі “Лепшы банкаўскі работнік”.

Гераіня аповеду з тых людзей, хто прытрымліваецца жыццёвай філасофіі — дзе чалавек нарадзіўся, там і згадзіўся. Менавіта таму пасля заканчэння Маладзечанскага ўлікова-планавага тэхнікума з задавальненнем вярнулася на малую радзіму, у пас. Глуша, дзе на працягу не аднаго года аказвала банкаўскія паслугі землякам. Пасля таго як аддзяленне ў пасёлку аптымізавалі, Святлане Леанідаўне як сумленнаму, прынцыповаму і адказнаму работніку прапанавалі аналагічную пасаду ў суседнім — аг. Гарбацэвічы. І вось ужо восем год, як працоўны дзень маёй суразмоўцы пачынаецца з аўтамабільнага ваяжу, часцей на ўласным транспарце, у суседні населены пункт. У чым, як яна заўважае, ёсць і станоўчыя моманты. Язда дазваляе настроіцца на дзелавы лад і не прапусціць — на што многія наракаюць — ніводную змену ў прыродзе.

На працоўным месцы Святлану Леанідаўну чакае нямала спраў. Найперш гэта работа з кліентамі — прыём, у тым ліку пасродкам банкаўскіх картак, камунальных плацяжоў, ажыццяўленне абменна-валютных аперацый, афармленне страхавых полісаў і г.д. Значную работу спецыяліст праводзіць па пашырэнні фінансавай граматнасці жыхароў аграгарадка — зручнаму дыстанцыйнаму выкарыстанню банкаўскіх паслуг, выкарыстанню інтэрнэт-банкінгу — праз інфа-кіёскі ці мабільныя дадаткі, па прыцягненні грашовых укладаў насельніцтва, расказвае пра выгоду таго ці іншага банкаўскага прадукта. І робіць гэта з характэрнай ёй сціпласцю, далікантасцю, інтылігентнасцю, праяўляючы клопат пра кліентаў, павагу да кожнага з іх. Такі падыход спецыяліста да справы адзначаюць як кіраўніцтва банка, так і кліенты непасрэдна гарбацэвіцкага аддзялення, і пакінутыя імі шматлікія падзякі ў кнізе водгукаў.

Сама ж Святлана Леанідаўна ў апошнім не бачыць нічога надзвычайнага. Проста, як кажа, яна надта любіць сваю работу і імкнецца выконваць яе “на выдатна”. А вынік пры такім раскладзе прыходзіць сам па сабе. Немалаважным фактарам лічыць спецыяліст і геаграфічнае становішча Гарбацэвічаў: па ажыўленай аўтатрасе Бабруйск-Слуцк, як яна заўважае, не-не ды і праедуць тыя, хто мае патрэбу ў тэрміновай банкаўскай паслузе.

У працяг тэмы фінансавай дасведчанасці кліентаў Святлана Паця заўважае, што сельскія жыхары даволі хутка асвойваюць банкаўскія прадукты, на яе аддзяленні літаральна ўсе карыстаюцца плацёжнымі карткамі. Апошняе, па словах суразмоўцы, змяншае працягласць правядзення аперацыі, але таксама і нагрузку на спецыяліста — з некаторага часу аддзяленне працуе толькі тры дні на тыдзень.

Пры ўсёй любові да прафесіі гераіня аповеду не настойвала, як прызнаецца, каб яе накірункам у гэтым плане пайшоў сын. Жанчына ўпэўнена — у прафесійным выбары неабходна прыслухоўвацца найперш да сябе. Толькі ў такім выпадку чалавек здольны цалкам раскрыць свой патэнцыял і прынесці максімальную карысць грамадству і сабе. Апошняе, па словах Святланы Паця, немалаважна: унутраная гармонія — адна з асноўных складаючых шчаслівага жыцця. У свой час прыняўшы правільнае рашэння, сама яна ні разу аб прафесійным выбары не пашкадавала.    

Алена КАРПЕНКА. Фота аўтара.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.