СВК “Гігант”: не здаючы перадавых пазіцый
Шчодрым на вытворчыя перамогі па выніках раённага спаборніцтва стаў мінулы год для СВК “Гігант”. Гаспадарка прызнана пераможцам у намінацыі “За лепшыя вынікі вытворча-эканамічнай дзейнасці”. 1-е месца калектыў заняў у намінацыях “За павелічэнне вытворчасці зерня”, “За павелічэнне вытворчасці рапсу”, “За павелічэнне вытворчасці малака”, 3-е — “За павелічэнне вытворчасці і продажу мяса”.
Лідарамі раённага спаборніцтва прызнаны калектыў таварнай фермы №3 в. Бірча (загадчык Татарынаў Сяргей Андрэевіч), — у намінацыі “Сярод калектываў ферм па адкорме буйной рагатай жывёлы”, галоўны інжынер Ігар Аляксеевіч Міхалёнак — у намінацыі “Лепшы інжынер”, вадзіцель гаспадаркі Аляксандр Уладзіміравіч Дайнека — у намінацыі “Лепшы малады вадзіцель”.
Даючы ацэнку мінулагодняму сельскагаспадарчаму году, дзелячыся ўражаннем ад перамог, старшыня СВК Міхаіл Пятровіч Левакоў (на фота ўверсе) заўважыў, што перамагчы ў раённым спаборніцтве, вядома ж, прыемна, але куды большая асалода — атрымаць перамогу ў сябе: дасягнуць небывалага ўраджаю ў раслінаводстве, надаіць болей, чым раней, малака, дасягнуць лепшага, чым калі, эканамічнага выніку.
І калектыў гаспадаркі, па яго словах, няўхісна да гэтага імкнецца — праз шматвектарнасць эканомікі, строгае выкананне тэхналогій вытворчасці, высокакваліфікаваныя кадры, сур’ёзны падыход да маркетынгу.
Акцэнтуючы ўвагу на раслінаводстве — галіна займае значнае месца ў агульнай структуры сельгасвытворчасці гаспадаркі і сёлета не дала, за выключэннем асобных культур, чакаемых вынікаў — Міхаіл Пятровіч Левакоў разважае, як заўжды, з філасофскім падтэкстам: “Не была дасягнута гармонія. Дзве з трох асноўных складаючых высокіх ураджаяў — праца людзей і тэхналогіі — у гаспадарцы, як і штогод, былі забяспечаны. А вось надвор’е — трэці фактар гарманічнага росту раслін, на якую чалавек не ў стане паўплываць — не ўсім культурам пасадзейнічала. Калі кукуруза парадавала (намалочана зерня ў дапрацаванай вазе 2 378,7 т (207,7%) пры ўраджайнасці 74,3 ц/га), болей з аднаго круга дала пшаніца (валавы збор склаў 2699,6 т пры ўраджайнасці 46,5 ц/га (107,4%), то для іншых відаў збажыны, бульбы гармоніі не атрымалася, расліны максімальна не развіліся, што негатыўна адлюстравалася на ўраджайнасці”.
Хлебны каравай гаспадарка атрымала хоць і ўвішны па вазе — валавы збор у дапрацаванай вазе збожжавых і зернебабовых (без кукурузы) склаў 4671,4 т — але не той, на які разлічвалі. Пры гэтым калектыў “Гіганта” неаднойчы даказваў, што здольны не толькі дасягаць, але пераўзыходзіць намечаныя рубяжы.
Як і штогод, Міхаіл Левакоў шмат цёплых слоў выказаў у адрас працаўнікоў, чые намаганні рухаюць вытворчасць. Дзякуючы чыёй адказнасці і прафесіяналізму (як спецыялістаў, так і людзей рабочых прафесій) СВК “Гігант” не губляе сваіх пазіцый, не толькі стабільна функцыянуе, але развіваецца, мадэрнізуецца — упэўнена крочыць у ногу з часам. Зладжаная каманда вытворчага кааператыву, па словах старшыні, настроена і надалей годна вырашаць пастаўленыя перад ёй задачы і ўпэўнена — няма тых вяршынь, якія б ёй не скарыліся.
Асаблівыя словы падзякі і прызнання, віншаванні з нагоды 8 Сакавіка Міхаіл Левакоў адрасуе жанчынам — цяперашнім і колішнім працаўніцам “Гіганта”. Усім ім жадае здароўя, кахання, дабрабыту і цудоўнага, сонечнага настрою.
Алена КАРПЕНКА. Фота з архіву рэдакцыі.