Веснавыя палявыя работы ў раёне пачаліся з падсейвання траў бабовых і бабова-зёлкавых сумясяў пад азімыя культуры.

Да гэтага прыступілі аграрыі філіяла “Харчавік-Агра” ААТ “Чырвоны харчавік” (падсеяна канюшына на плошчы ў 180 га) і філіяла “Агракамбінат КХП” ААТ “Бабруйскі камбінат хлебапрадуктаў” (болей за 60 га). “Пасля замінкі, выкліканай кароткачасовым снегам, за гэтую работу возьмуцца і ва ўсіх астатніх сельгасарганізацыях”, — паведаміла начальнік вытворчага аддзела ўпраўлення сельскай гаспадаркі і харчавання райвыканкама Жана Жукоўская. Акрамя таго, з яе слоў, пяць раённых гаспадарак — філіял “Варатынь” ААТ “БЗТДіА”, “Агракамбінат КХП”, ААТ “Міхалёўская Ніва”, “Саўгас Кісялевічы” і  Баб­руйскі ААТ “Аграмашсервіс”, прыступілі да ранне-веснавога ўзворвання палёў (усяго ўвесну заарана болей за 300 га плошчаў). У бліжэйшыя дзень-два, як плануецца, да гэтага віду работ падключацца іншыя сельгасарганізацыі Бабруйшчыны. Зрэшты, у СВК “Гігант” і філіяле  “Харчавік-Агра” палі ўзараны пад зябліва.

Алена КАРПЕНКА.