Нямала працоўных дасягненняў па выніках мінулага года на рахунку філіяла “Варатынь” ААТ “БЗТДіА”, калектыў якога ўзначальвае Уладзімір Віктаравіч Давыдзенка (на фота). Гэта найперш перамога ў намінацыі “За эфектыўнае выкарыстанне сельскагаспадарчых угоддзяў”. Другое месца гаспадарцы прысуджана ў намінацыях “За павелічэнне вытворчасці зерня”, “За павелічэнне вытворчасці рапсу”, “За павелічэнне вытворчасці і нарыхтовак малака”, “За павелічэнне вытворчасці і нарыхтовак мяса”.

“Кожны сельскагаспадарчы год нечым асаблівы, — разважае Уладзімір Давыдзенка. — Мінулы, напрыклад, тым, што працяглы час не было дажджоў, калі яны надта патрабаваліся. Гэтая акалічнасць негатыўна адбілася на раслінаводчай галіне — ураджайнасці збожжавых культур і рапсу. Між тым, здаўшы масланасенне рапсу на КХП — усё зерне пайшло першым класам — мы парадаваліся і таму, што цалкам закрылі дзярж­заказ”.

А вось кукуруза, па словах кіраўніка філіяла, не падвяла. І зерня ў гаспадарцы намалацілі 1800 тон (узялі звыш 100 ц/га ў бункернай вазе), і зялёнай масы атрымалі амаль 3400 тон. Адсюль і корму для жывёлы нарыхтавалі у паўтара разы болей, чым у 2017 го­дзе: сена столькі ж, а сенажу і сіласу з запасам на наступную зімоўку. “Хто ведае, якім будзе 2019-ты, — адзначае Уладзімір Давы­дзенка, — а пагалоўе трэба накарміць, ды не абы-як, а з разлікам на павелічэнне надояў”.

З атрыманага кукурузнага зерня 400 тон на ўласным камбікормавым заводзе заплюшчылі, астатняе высушылі і гатуюць з яго камбікорм. Па меркаваннях дырэктара, менавіта апошняе станоўча паўплывала на тое, што вось ужо колькі месяцаў філіял упэўнена “плюсуе” па малаку. Валавая вытворчасць за студзень-снежань мінулага года склала 5760 тон. На ўзроўні папярэдняга, і гэта пры тым, што ўвесну, з-за дэфіцыту корму, надоі ў гаспадарцы падалі. Таварнасць малака па выніках года склала 97%. 44% ад агульнага аб’ёму рэалізаванага дзяржаве малака прадалі гатункам “экстра”. Год ад года ў гаспадарцы нарошчваюць пагалоўе буйной рагатай жывёлы. У мінулым атрымалі прыплоду на 188 галоў больш, чым у папярэднім годзе (114%). У цэлым жа пагалоўе БРЖ павялічылі на 130 галоў, цяпер тут 3773 галавы, у тым ліку 1355 кароў.

Нядрэнна спрацаваў калектыў і па вытворчасці мяса.

“Ферма в. Аўсімавічы па адкорму буйной рагатай жывёлы ў нас хоць і невялікая — 600 галоў, а ўсё ж дадатковы заробак, — гаво­рыць дырэктар. — За люты, да прыкладу, прадалі каля 70 галоў, а гэта ўжо немалая капейка гаспадарцы. Людзі на ферме працуюць сумленныя, корму жывёле хапае, таму і прывагі адпаведныя”.

Працуючы на перспектыву, у мінулым годзе ў філіяле адрэканструявалі памяшканне для ўтрымання жывёлы на МТК в. Коўрын — цяпер там на адкорме 220 цялушак. Пабудавалі, як і планавалі, тры сянажныя траншэі. Калектыў, па словах дырэктара, нацэлены на далейшую плённую работу, а працавітасці іх людзям не займаць.

Алена КАРПЕНКА.