Мерапрыемства пад такой назвай правялі на мінулым тыдні медработнікі Бабруйшчыны для старшакласнікаў і педагогаў Цялушскага ВПК “Дз/сад-СШ” ў рамках інфармацыйна-прафілактычнай акцыі “Абараняючы іншых, ты абараняеш сябе”, якая праходзіць у раёне з 10 лютага па 5 сакавіка і прымеркавана да Дня прафілактыкі інфекцый, што перадаюцца палавым шляхам, і Міжнароднага дня барацьбы з наркаманіяй.

У мэтах падзяліцца рэкамендацыямі адносна здаровага ладу жыцця і адказаць на хвалюючыя пытанні школьнікаў наведалі інспектар-валеолаг БГП №2 Ларыса Колесава, псіхолаг паліклінікі Святлана Цішкова, урач-нарколаг Бабруйскага наркалагічнага дыспансера Людміла Рогава і акушэрка мясцовай участковай бальніцы Таміла Ткачова. Кожны са свайго боку, медработнікі даводзілі вучням, што быць здаровым — прыгожа і сучасна. У прыватнасці, Ларыса Колесава заакцэнтавала ўвагу на тым, што здароўе адкрывае перад моладдзю шлях да паспяховай працы і шчаслівага сямейнага жыцця, шкодныя ж залежнасці, наадварот, мяшаюць у дасягненні пастаўленых мэт. Акушэрка распавяла будучым мамам і татам, як важна клапаціцца пра арганізм і рэпрадукцыйную сістэму з дзяцінства — што такое інфекцыі, якія перадаюцца палавым шляхам, у чым іх шкода і як папярэ­дзіць.

Людміла Рогава з уласнай практыкі прывяла прыклады зламаных лёсаў маладых людзей, якія паддаліся спакусе наркотыкаў і, не знайшоўшы моцы пазбавіцца ад шкоднай звычкі, маральна і фізічна дэградавалі, а то і ўвогуле згубілі жыццё. З інтарэсам праслухалі школьнікі выступ псіхолага, якая ў даступнай моладзі форме патлумачыла, чаму так важна напаўняць сваё жыццё цікавымі заняткамі, імкнуцца раскрыць сябе як асоба, ставіць мэты і іх дасягаць — усё гэта не дае засяродзіцца на негатыўным, псіхічна загартоўвае чалавека.

Тэкст і фота Алены КАРПЕНКІ.