Вучыцца, вучыцца і яшчэ раз — вучыцца
Абгрунтаваць неабходнасць падыходу да вырошчвання маладняку буйной рагатай жывёлы не па прынцыпе “як прыйдзецца”, а як патрабуе тэхналогія, на што даўно зрабілі стаўку перадавыя гаспадаркі краіны, не кажучы ўжо пра сусветных вытворцаў сельгаспрадукцыі, навучыць гэтаму — задача, якую ставілі перад сабой упраўленне сельскай гаспадаркі і харчавання райвыканкама сумесна з ЗАТ “Экамол Агра”, арганізаваўшы на базе ААТ “Міхалёўская Ніва” на мінулым тыдні семінар-вучобу для кіраўнікоў, галоўных зааветспецыялістаў сельгасарганізацый, загадчыкаў і работнікаў найбольш буйных малочна-таварных ферм раёна.
Уладзімір Пярэднеў, кансультант “Экамол Агра”— аднаго з найбуйнейшых прадпрыемстваў краіны па прыгатаванні высокаякасных, збалансаваных камбікармоў, дэталёва, з выкарыстаннем відэанагляднасці, спыніўся на кожным звяне тэхналагічнага ланцугу вырошчвання маладняку, засяродзіў увагу на паслядоўнасці звенняў, нормах тэхрэгламенту на кожным з іх і магчымасцях іх дасягнуць.
“У радзе раённых гаспадарак тэхналогія вытворчасці БРЖ адпрацавана, — адзначыў намеснік начальніка райсельгасхарчу Аляксандр Кісялёў, — пра гэта сведчаць трохмесячныя цялушачкі вагой 105-110 кг. Аднак маюцца і 75, і 80 кг у гэтым узросце, таму нам ёсць куды імкнуцца, чаму вучыцца”. Аляксандр Кісялёў назваў і галоўныя патрабаванні да першага этапу вырошчвання маладняку — утульны індывідуальны домік для маленькай жывёлы (дадзенае пытанне гаспадаркамі ў асноўным вырашана), выкарыстанне камбікорму (КР-1) для дадзенага ўзросту, наладжаная, у адпаведнасці з тэхналогіяй, схема выпайкі малака цялятам і навучаны, з адказным падыходам да ўскладзеных на яго абавязкаў работнік па доглядзе маладняку.
Усё гэта, па словах Аляксандра Кісялёва, вырашальнае. Галоўнае, каб людзі, якія ўзяліся задачу вырашаць — ад кіраўніка да жывёлавода, усведамлялі залежнасць вынікаў галіны ад тэхналогій і рабілі ўсё магчымае, каб яны былі станоўчыя.
Семінар-вучоба ў “Міхалёўскай Ніве”, — упэўнены ў райсельгасхарчы, стаў яшчэ адной ступенькай да паспяховага авалодвання навукай вырошчвання маладняку, паляпшэння эканомікі гаспадарак.
Алена КАРПЕНКА.