Рыхтуюцца да веснавых палявых работ у гаспадарцы без нахрапу, як гэта зачастую здараецца, а планамерна і размерана, дэталёва прадумваючы кожны крок мерапрыемстваў.

На гэтую пару амаль завяршылі ачыстку насення мнагалетніх траў (ачышчана 6 тон з сямі неабходных), каб да сярэдзіны лютага праверыць яго якасць. У стадыі завяршэння — вывазка на палі арганічных угнаенняў (з 20 тысяч тон вывезена 18). Прычым, 11 тысяч тон арганікі ўнеслі пад зябліва з восені. Літаральна пад поўную патрэбу забяспечаны мінеральнымі ўгнаеннямі — азотнымі і калійнымі на 100%, фосфарнымі — на 80%, аднак да часу сяўбы і іх недастаючая частка будзе набыта. Сродкаў для пратручвання насення пакуль прыкладна палова ад неабходнага, але, па словах галоўнага агранома Валянціны Якаўлеўны Масолавай, і іх збіраюцца набыць своечасова і ў поўным аб’ёме — якраз зараз вывучаюцца прапановы.

У філіяле “Харчавік-Агра” з адказнасцю ставяцца да тэхналогіі вырошчвання культур і ўпэўнены — сёлетняя вясна, як і папярэднія, для іх нечаканасцю не будзе.

Алена КАРПЕНКА.