Вынікі работы аграрнай галіны вобласці за 2018 год і задачы на сёлетні абмеркавалі ўдзельнікі сумеснага пасяджэння калегіі Міністэрства сельскай гаспадаркі і харчавання Рэспублікі Беларусь сумесна з Магілёўскім аблвыканкамам.

Мерапрыемства прайшло на Бабруйшчыне 1 лютага. Удзел у яго рабоце прынялі старшыня Магілёўскага аблвыканкама Уладзімір Даманеўскі, намеснік прэм’ер-міністра РБ Міхаіл Русый, памочнік Прэзідэнта, інспектар  па Магілёўскай вобласці Генадзь Лаўрэнкоў, прадстаўнікі галіновага міністэрства, навукоўцы, старшыні гар- райвыканкамаў, начальнікі і спецыялісты райсельгасхарчаў, кіраўнікі сельгасарганізацый, дырэктары перапрацоўчых прадпрыемстваў АПК Магілёўшчыны. Усе тыя, ад каго, як заўважыў міністр сельскай гаспадаркі і харчавання Леанід Заяц,  залежыць стан спраў у аграпрамысловым комплексе і хто ўсклаў на сябе абавязак галіну развіваць.

Вынікі 2018 года (зніжэнне, у параўнанні да папярэдняга, вытворчасці малака і мяса) выразна далі зразумець, як было адзначана, што работа аграрнай галіны вобласці патрабуе перафармаціроўкі. Развіваць на сучасным этапе раслінаводства і жывёлагадоўлю можна толькі пры ўмове безагаворачнага выканання тэхналагічных патрабаванняў. Зразумець гэта і арганізаваць работу сельгасвытворчасці ў адпаведнасці з рэкамендацыямі спецыялістаў і навукоўцаў  — задача, за вырашэнне якой неадкладна павінны ўзяцца ў кожным раёне, кожнай гаспадарцы, каб дасягнуць намечаных па выніках пяцігодкі рубяжоў, палепшыць дабрабыт працаўнікоў і краіны.   

Алена КАРПЕНКА. Фота Генадзя БАГДОНАСА.