Праект-конкурс «Бацькаўшчына светлая мая», прысвечаны Году малой радзімы, быў абвешчаны ў новым сезоне Першым нацыянальным каналам Беларускага радыё сумесна з літаратурна-мастацкім часопісам «Маладосць».

На працягу года слухачы і чытачы будуць мець магчымасць выказаць любоў да роднай зямлі, паказаць яе прыгажосць, гісторыю, культуру ў мастацкай форме: вобразна, шчыра, арыгінальна. Толькі за лістапад арганізатары конкурса атрымалі больш за 100 твораў ад 20 аўтараў. Па выніках галасавання журы пераможцамі вызначаны 7 канкурсантаў. Прыемна адзначыць, што ў лік першых канкурсантаў у намінацыі «Паэзія» ўвайшла Любоў Адамацкая з вёскі Слабада Баб­руйскага раёна. Яна была запрошана на літаратурны «Творчы вечар» у эфіры Беларускага радыё. У праграме прымалі таксама удзел паэт, лаўрэат Дзяржаўнай прэміі Беларусі Мікола Мятліцкі, галоўны рэдактар часопіса «Маладосць», іншыя знакамітыя асобы.

Жадаем далейшых поспехаў Любові Адамацкай, а таксама звяртаем увагу, што конкурс «Баць­каўшчына светлая мая» працягваецца. Для ўдзелу ў намінацыі «Паэзія» дапускаецца не больш за адзін верш любога памеру ад аднаго ўдзельніка, у намінацыі «Эсэ» прымаецца адзін тэкст памерам ад 4000 да 8000 знакаў. Вызначаны тры ўзроставыя катэгорыі ўдзельнікаў: да 16 гадоў, ад 16 да 35-ці, ад 35 гадоў і старэйшыя. Агульныя вынікі конкурса будуць абвешчаны ў верасні 2019 года. Пераможцамі стануць аўтары найлепшых тэкстаў, якія адбярэ прафесійнае журы (па тры ў кожнай з намінацый). Таксама адбудзецца публікацыя лепшых твораў у часопісе «Маладосць».

Алесь КРАСАВІН.

Падрабязнасці шукайце ў Палажэнні конкурса на сайце: http://zviazda.by/be/edition/maladosc.