Збалансаваныя рацыёны — аснова правільнага кармлення

Нягледзячы на цёплыя кастрычніцкія дні ў большасці раённых сельгасарганізацый на гэтую пару, як таго патрабуе тэхналогія, завяршылі перавод жывёлы на зімне-стойлавае ўтрыманне. Апошняе мае на ўвазе найперш сур’ёзныя патрабаванні да кармлення жывёлы, у асаблівасці дойнага статку. Менавіта іх, а таксама пытанні вырошчвання маладняку абмеркавалі ўдзельнікі раённай вытворчай нарады па жывёлагадоўлі — галоўныя спецыялісты зааветслужб і загадчыкі малочна-таварных ферм гаспадарак.

Мерапрыемства прайшло пад началам намесніка начальніка ўпраўлення сельскай гаспадаркі і харчавання райвыканкама Аляксандра Кісялёва з удзелам спецыялістаў райсельгасхарчу.
З улікам таго, што травянога корму на гэтую пару ў цэлым па раёне нарыхтавана 25,2 ц к. адз. на ўмоўную галаву жывёлы (у філіяле “Харчавік-Агра” ААТ “Чырвоны харчавік” звыш 39 ц к. адз., у Бабруйскі ААТ “Аграмашсервіс” — амаль 30, у ААТ “Міхалёўская Ніва” — 25,2), і нарыхтоўка кукурузнага сіласу працягваецца, можна меркаваць, што без корму раённая жывёла не застанецца. Іншая справа — яго якасць: якраз у гэтыя дні сянаж даследуецца на адпаведныя паказчыкі — і правільны падыход да кармлення.
“Надзвычай важна — балансаваць рацыёны па асноўных харчовых рэчывах, неабходных для здароўя, жыццядзейнасці і прадукцыйнасці жывёлы, гатаваць паўнавартасныя кормасумясі з сенажу і сіласу, з прымяненнем канцэнт­раванага корму, патакі, жому, цукровых буракоў”, — адзна­чыў, звяртаючыся да ўдзель­нікаў нарады Аляксандр Кісялёў. І ён сам, і спецыялісты райсельгасхарчу нагадалі, як гэта рабіць правільна, тэхналагічна прадумана.
Другім, не меней значным пытаннем нарады было вырошчванне маладняку буйной рагатай жывёлы. Яго абмеркаванне прайшло ў форме іспыту — загадчыкі ферм рабілі раскладку сваіх дзеянняў у выпадку нараджэння цяляці, выпайкі нованароджанай жывёліны зондам, прыгатавання корму для маладняку, для навацельных кароў і інш. Сваімі парадамі адносна абмяркоўваемага пытання падзяліліся спецыялісты гаспадарак, дзе гэтая работа пастаўлена належным чынам, у прыватнасці, філіяла “Харчавік-Агра”.
Была звернута ўвага на работу з кадрамі — узаемасувязь удзельнікаў нарады з работнікамі ферм, правядзенні тлумачальнай работы з аператарамі машыннага даення, даглядчыкамі, тымі, хто мае непасрэднае дачыненне да догляду жывёлы. А таксама на зацікаўленасць саміх спецыялістаў у выніках працы. Практыка паказвае, што і першае, і другое актуальнае. За абмеркаваннем догляду маладняку ў зімовых умовах у першыя месяцы жыцця выявілася, што не на ўсіх фермах маюцца прызначаныя для гэтых мэт лямпы. Іх набыццё не ў кампетэнцыі тых жа загадчыкаў МТФ, але задача апошніх, па словах Аляксанд­ра Кісялёва, давесці праблему да кіраўніка і дасягнуць яе вырашэння. Тое ж і ў дачыненні падначаленых: недастаткова паставіць задачу — важна пракантраляваць яе выкананне, а ў выніку немагчымасці апошняга — выявіць прычыну і знайсці спосаб пазбавіцца ад яе. Толькі пры такім падыхо­дзе калектыў можа разлічваць на станоўчы вынік сваёй работы.
Алена КАРПЕНКА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.