Наш раён другі год запар прызнаны лепшым раёнам Магілёўскай вобласці для вядзення бізнесу
Экспертнае журы з вядучых эканамістаў, прадстаўнікоў дзяржорганаў і бізнес-асацыяцый назвала лепшыя рэгіёны Беларусі для бізнесу з найбольш развітай дзелавой актыўнасцю і найлепшымі ў маштабах краіны ўмовамі для развіцця прадпрымальніцтва — цырымонія ўзнагароджання рэгіёнаў-пераможцаў прайшла на мінулым тыдні ў Мінску.
Прыемна адзначыць, што ў намінацыі “Лепшы раён Магілёўскай вобласці для бізнесу Беларусі-2018” пераможцам прызнаны Бабруйскі раён. Лепшым абласным горадам стаў Гомель, сярод абласцей першынства ў Мінскай.
Конкурс “Лепшы горад (раён, вобласць) для бізнесу” праводзіцца ў краіне з 2008 года. Яго ініцыятарамі выступілі Саюз юрыдычных асоб “Рэспубліканская канфедэрацыя прадпрымальніцтва” сумесна з рэгіянальнымі бізнес-асацыяцыямі пры падтрымцы Міністэрства эканомікі Рэспублікі Беларусь.
У гэтым годзе вызначэнне пераможцаў ажыццяўлялася па 10 асноўных намінацыях і двух дадатковых. На прыняцце рашэння, як адзначыла намеснік старшыні Бабруйскага райвыканкама Марына Тарэлкіна, уплывалі такія параметры, як колькасць дзеючых суб’ектаў гаспадарання, аб’ём пералічаных падаткаў, удзельная вага створаных новых працоўных месцаў, тэмп прыросту гэтых паказчыкаў у параўнанні з мінулым годам і інш. Што датычыцца нашага раёна, то на сёння, па яе словах, зарэгістравана 693 суб’екты малога прадпрымальніцтва, у тым ліку 399 — юрыдычныя асобы і 294 — індывідуальныя прадпрымальнікі. Лічба зарэгістраваных суб’ектаў бізнесу (юрыдычных асоб) павялічваецца штогод прыкладна на 20.
Алена КАРПЕНКА.