Праблемы занятасці — у праблеме адносін да занятасці

Пастаянна дзеючая раённая камісія па каардынацыі работы па садзеянні занятасці насельніцтва пад началам старшыні райсавета дэпутатаў Людмілы Крычко, якая ў мінулую пятніцу працавала на базе Цялушскага сельвыканкама, пацвердзіла ўжо неаднойчы выяўленае — праблема занятасці некаторых непрацуючых грамадзян у іх адносінах да той самай занятасці.

Трыццацігадовай жыхарцы аднаго з населеных пунктаў сельсавета, за плячыма якой усяго два месяцы вучобы ў тэхналагічным каледжы і адсут­насць хоць бы якой “корачкі”, прафесія даяркі ў філіяле “Харчавік-Агра” ААТ “Чырвоны харчавік”, якую маладая жанчына асвойвала на працягу некалькіх месяцаў, не прынесла асалоды: занадта бадатымі аказаліся рагулі. Як не мелі працягу і намаганні ўпраўлення па працы, занятасці і сацабароне райвыканкама накіраваць яе на вучобу для атрымання прафесіі. Да апошняга не дайшло: на паўдарозе ў грамадзянкі адпала жаданне выконваць рэкамендацыі спецыялістаў. На запытанне членаў камісіі, што яна думае надалей, тая няўпэўнена адказала: “Ну, можа, давайце пайду вучыцца”.
Яшчэ адна наведвальніца з парога выказала гатоўнасць ісці на працу “хоць заўтра”. Пры гэтым паскар­дзілася на наймальнікаў, якія адмаўляюць у яе сур’ёзных намерах. На заўвагу старшыні сельвыканкама Мікалая Сакуна, ці не спрабавала грамадзянка выключыць з жыцця спіртное, з непаразуменнем у голасе паведаміла, што ўжывала толькі ўчора і тое адзін стограмовік.
Наведаліся ў сельвыканкам у мінулую пятніцу і тыя, каму сапраўды патрабуецца дапамога з прафесійным вызначэннем. З кожным з іх члены камісіі папрацавалі індывідуальна, прапанавалі вакансіі, якія адпавяда­юць атрыманай чалавекам адукацыі ці іншым яго патрабаванням. Тым, для каго замінкай у працаўладкаванні з’яўляецца адсутнасць дакументаў, што сведчаць асобу, вырашана паса­дзейнічаць у іх набыцці. Адзін з неахоп­леных грамадска-карыснай працай цялушанцаў выказаў намер заняць вакансію стоража ў ААТ “Неўскі-Агра”. Яшчэ адзін прыняў прапанову на работу ў сельгаспрадпрыемстве ад дырэктара мясцовай гаспадаркі Міхаіла Стрыжэўскага, які таксама ўдзельнічаў у рабоце камісіі.
Такім чынам, без увагі камісіі не застаўся ніхто з 9-ці наведвальнікаў. Праўда, калі адным пасадзейнічалі ў працаўладкаванні, то асобным — у лячэнні ад алкагалізму.
Варта адзначыць, што наступныя выязныя пасяджэнні раённай камісіі па каардынацыі работы па садзеянні занятасці насельніцтва адбудуцца 9 кастрычніка: у Брожскім сельвыканкаме а 10 гадзіне, у Хімоўскім — а 15-й.
Алена КАРПЕНКА.
Фота аўтара.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.